-Almmuhus-
-Almmuhus-
OAIVILAT Galgetgo urbána árvvut báidnit min bivddu?

Galgetgo urbána árvvut báidnit min bivddu?

-

-

Finnmárkku jietna ferte gullot go ođđa fuođđoláhka hábmejuvvo.

Kronihkka čállon Jan Ollis, FeFo direktevra

Finnmárkku 7 000 jagi boares báktesárgumiid rájes gitta otná rádjai leat mii ávkkástallan luonddus. Dál leat gaskal 15.000 ja 20.000 bivdi ja meahcásteaddji.

Eanadoallo- ja biebmodepartemeanta ja Gielda- ja ođasmahttindepartemeanta bovdejedje gieskat cealkámuščoahkkimii dan oktavuođas go jagi 1981 addojuvvon fuođđoláhka galgá ođasmahttojuvvot. Beroštusorganisašuvnnat ja earát bovdejuvvojedje cealkit oaiviliiddiset. FeFo searvvai maiddái čoahkkimii.

Čoahkkimis digaštallojuvvojedje máŋga ášši, mat gusket midjiide finnmárkulaččaide, earenoamážit daidda geat doaimmahit sámi árbevirolaš meahcásteami:

–  Galgágo fuođđoláhka ain bissut, vai galgágo eará láhka gustot buot áššiide mat gusket bivdui – nugo ovdamearkka dihtii luondduvalljivuođaláhka?

–  Galgágo leat lohpi bivdit juovllaid ja beassážiid áigge?

–  Galgágo giđđalodden joatkašuvvat?

–  Galgágo leat lohpi bivdit rievssahiid ja njoammiliid?

–  Man muddui galgá láhka suodjalit sámi beroštumiid?

TNS-Gallup 2017 Luonddu- ja birasbaromehtera mielde leat golbma njealjádasa norgalaččain miehtemielagat bivdui. Liikká vuohttit mii ahte urbána árvvut, mat guddet vuostehágu bivdui, ain deattuhuvvojit digaštallamiin. Beroštusorganisašuvnnat mat ovddidit dáid guottuid, bidjet searaideaset váikkuhit ođđa fuođđolága hábmenprosessii. Danne lea hui dehálaš ahte mii, geat beroštit bivddus, eat váldde vuoigatvuođaideamet diehttalassan. Servodat heivehallojuvvo urbána eallinvuohkái. Lágat hábmejuvvojit Stuorradikkis, ja stuorragávpogiid ássit dat besset eanemusat váikkuhit dasa geat dohko válljejuvvojit min áirrasin. Danne fertet mii, geat ássat boaittobealde ja geat galgat láhčit dilálašvuođaid bivdui, geavahit iežamet jiena – sihke fuođđuide ja bivdái buorrin.

Sámediggi bargá dan ala ahte sihkkarastit ja ovddidit sámiid gielaid, kultuvrra ja servodateallima, ja lei maiddái bovdejuvvon cealkámuščoahkkimii. Mii ávžžuhit Sámedikki, beroštusorganisašuvnnaid ja báikkálaš fuođđoeiseválddiid searvat prosessii, vai mii sáhttit searválagaid váikkuhit boahtteáiggi lágaide dakkár vuogi mielde, mii áimmahuššá finnmárkulaččaid beroštumiid ja sámi kultuvrra ja servodateallima.

- Advertisement -
-Almmuhus-