Iežárlávvu, talkšovvat ja válgaságastallamat arenain gos dábálaččat eai láve dakkárat, lea oasáš sisdoalus maid Ávvira ja NRK Sámi journalisttat leat ovttas hutkán sámi nuoraide.
Iežárlávvu, talkšovvat ja válgaságastallamat arenain gos dábálaččat eai láve dakkárat, lea oasáš sisdoalus maid Ávvira ja NRK Sámi journalisttat leat ovttas hutkán sámi nuoraide.
Dál lea Sámedikki válgajahki, ja dalle bohtet leat válgaáššit hui guovddážis visot mediáin sámis.
Dat mii dán jagi galgá buktit buoret vuođu jienasteddjiide, ja erenoamážit nuoraide, ipmirdit politihka, lea ahte Ávviris ja NRK Sámis lea ovttasbargu mii galgá ge juste nuoraid oažžut beroštit sámedikkeválggas.
Olahit nuoraid
Ávvira váldodoaimmaheaddji, Kari Lisbeth Hermansen, čilge manin Ávvir lea válljen dákkár ovttasbarggu ásahit NRK Sámiin.
– Jurdda ovttasbargguin lea čohkket searaid, fállat válggaid oktavuođas buriid buvttademiid mat leat heivehuvvon sámi nuoraide. Mihttun lea fállat sámi nuoraide earálágán sisdoalu, mii boktá sin beroštumi válggaide ja politihkkii, čilge Hermansen.
Lea vuosttaš geardde go Ávviris ja NRK Sámis lea doaimmahuslaš ovttasbargu. Duogážiin ovttasbargui lea Mediamáŋggabealátvuođaraporta mii almmuhuvvui árabut dán jagi.
Lohpida olu buori sisdoalu
Ávvir neahttajođiheaddji, Berit Marie Lise Eira, lohká ahte sávvamis lohkkit dahje geahččit liikojit dasa maid sii fállet dáinna ovttasbargguin geasi mielde. Son lohpida dakkár sisdoalu mii ii leat ovdal leamaš sámi mediain.
Muhto son ii muital gal mii lea vuordimis:
– In eisege sáhte muitalit, muhto sisdoallu lea heivehuvvon nuoraid beroštumiid mielde, seammás go galgá boktit beroštumi sámediggeválggaide, muitala son.
Festiválain oidnosis
Ávvir ja NRK Sápmi galget ovttasráđiid buvttadit osiid válgasáddagiid Riddu Riđus, Márkomeanus ja sierra válgadáhpáhusas Romssas borgemánu.
– Sisdoallu ii šatta seammalágan dán golmma dáhpáhusas, muhto sáhtán namuhit ahte mis lea IežárLávvu, talkšovva ja olu suohttasat vuordimis, muitala neahttadoaimmaheaddji.
Vuosttaš geardde hutkkus
NRK Sámi válgakoordináhtor, Anne Randi Solbakken, muitala ahte váldoulbmil ovttasbargguin lea čohkket searaid ja hutkat hutkosiid maid eai leat goassege ovdal dahkan.
– Min mihttu lea nagodit fállat buoremus buktaga maid sáhttit, ja dan ovttasbarggu olis áigut dahkat juoidá maid eat leat vel ovdal dahkan, muitala Solbakken.
Erenoamážit nuoraide
Solbakken muitala ge mii lea maid vuosttaš geardde galget dahkat. Son lohká dan galgat hui oidnosis festiválain leat, ja dat lea ge «Iežarlávvu». Son muitala dat lea unna lávoš maid sii ceggejit sihke Riddu Riđus ja Márkomeanus, masa ii čága eambbo okta duollji ja iPad.
Son lohká ahte jurdda lea giktalit nuoraid mannat lávvui ja muitalit Ipadii mii sin ballu lea, jearrat politihkkáriin dákkár gažaldagaid maid dušše nuorat máhtte jearrat, ja nu ain.
– Mii háliidit ahte nuorat galget hábmet válgadebáhtaid dán jagi. Sii dat galget beassat jearrat daid gažaldagaid main nuorat beroštit. Dan jáhkán mii nagodit maid olihit dáinna Iežárlávuin, lohká son.
Neahtas ja sosiala mediain
Govven: Nils Johan Vars
Ávvira ja NRK Sámi oktasaš buvttadeamit almmuhuvvojit dán guovtti doaimmahusa neahttasiidduin, TVs, radios, ja diehttelasat bidjat stuora deattu almmuhit arenain gos nuorat leat, namalassii sosiála mediain nugo Snapchattas, Instagrammas ja Facebookas.
Ráddjejuvvon ovttasbargu
Ávvira váldodoaimmaheaddji Kari Lisbeth Hermansen namuha vel loahpas ahte vaikko dán guovtti doaimmahusas lea ovttasbargoprošeakta, de lea ovttasbargu gáržžiduvvon dušše dáid namuhuvvon prošeavttaide.
– Muđui hal ii ovttasbargu nannešii mediamáŋggabealátvuođa, loahpaha son vel.
