Boahtte vahkku galgá Ruoŧa Sámediggi mearridit gosa Sámedikki ođđa parlameantavisti galgá ceggejuvvot.
Ruoŧa Sámediggi čoahkkana boahtte vahkku Orrestaarii/ Örnsköldsvikii.
Orrestaare lea ge guovvamánu 1. beaivvi 2019 rájes mielde Sámegiela hálddašanguovllus.
– Stuora gažaldat mii galgá meannuduvvot go Sámedikki politihkalaš orgána čoahkkana, lea diehttelasat gažaldat gosa Sámedikki boahttevaš parlameantavisti galgá ceggejuvvot. Molssaeavttut leat Giron, Staare (Östersund) dahje Vilhelmina, muitala Ruoŧa Sámedikki stivraságadoalli Paulus Kuoljok preassadieđáhusas.
Viiddis guorahallan dahkkon
Kuoljok muitala ahte vuođđun mearrádussii lea viiddis guorahallan man PWC lea ráhkadan ja mas leat buohtastahttán dan golbma molssaeeavttu.
– Gažaldat dál lea guhte suohkan loahpaloahpas mearriduvvo báikin ođđa vistái. Sámi parlameantavisttis lea stuora symbolalaš mearkkašupmi, ja leat máŋga suohkana oččodan sihke vistti ja bargiid mat dan mielde čuvvot iežaset guvlui, muitala stivraságadoalli.
