Norgga eanadoalubagadallan (NLR) leat virgádan guokte ođđa ráđđeaddi. Sudno bargun lea ráhkadit DBS-vuogádaga boazodollui ja leat ráđđeaddin. NBR jođiheaddji illuda ja lohká viimmat boazodolliid sihkarvuohta nannejuvvo.
Norgga boazosápmelaččaid riikkasearvvi jođiheaddji Ellinor Marita Jåma muitala Ávvirii ahte Norgga Boazosápmelaččaid Riikasearvi (NBR) lea máŋggaid jagiid badjel ovttas NLR:in bargan cegget fálaldaga. Son lea duhtavaš go fálaldat viimmat lea jođus.
– Viimmat. Dát bargu lea dehálaš earret eará go geahččat bárteloguid boazodoalus, ja easttadit psyhkalaš ja fysalaš beliid. Go lea duođaštuvvon ahte boazodoalus eai oza veahki jus rahčet psyhkalaččat dahje fysalaččat, dadjá NBR jođiheaddji Ellinor Marita Jåma.
Sihkarvuohta
Šiehtadanbealli boazodoallošiehtadusas leat dahkan soahpamuša Norgga eanadoalubagadallamiin (NLR) čađahit pilohtaprošeavtta mas ulbmilin lea ásahit Dearvvašvuođa, biras ja sihkarvuođa (DBS-vuogádaga) bálvalusa boazodollui. NLR leat virgádan Anna Kristine Sokki Bongo ja Johan Martin Stenfjell doaimmahit ámmáha.
Vuordámuš
Son muitala sis leat stuorra vuordámušat ja maiddái jáhkku ahte dát guovttis lihkostuvvába bargguin.
– Dát lea áibbas ođas ealáhussii ja maiddái sudnuide, muhto jáhkán buohkat leat gergosat fálaldahkii. Dan diehtit go earret eará báikkálaš searvvit leat hástán sin sihkarvuhtii bidjat návccaid, dadjá Jåma.
DBS-dárbu boazodollui
Sihke Anna Kristine Sokki Bongos ja Johan Martin Stenfjellas lea duogáš boazodoalus ja dearvvašvuođasuorggis. Goappašagat leaba gergosat dustet hástalusa ja oaivvildeaba ahte lea stuorra dárbu systematiseret DBS-vuogádaga boazodollui.
– Áigumuš lea čohkket dieđuid, go dál olu DBS-doaibmat čađahuvvot maid eat jáhke leat justa dat. Dat lea árbevieruvásáhusas sáhka, mii fertet maid geahččat mii dahkko ja mii lea dahkkon. DBS-systemii boazodoalus lea dárbu. Máŋga vahága livčče sáhttán hehttet, oaivvilda Anna Kristine Bongo gii bargá Guovdageainnu kantuvrras.
Johan Martin Steinfjell, geas lea bargosadji Skjetlein báikkis, Trøndelagas, lasiha:
– Oainnán dan seamma. Olbmot váibet oalle nuorran. Oainnán dárbbu systematiseret ja ovdánahttit dearvvašvuođabálvalusa mii lea heivehuvvon boazodillái. Fertet leat dihtomielalaččat dán birra ja juohkit dieđuid. Fertet duostat hállat min dearvvašvuođa birra dán garra ealáhusas.
Ovdamunni
NLR galgá skáhppot DBS-ráđđeaddibálvalusa ja lágidit kursa ja bagadallančoahkkima aktevrraide ealáhusas buot orohagain. Galgá maid fállot fidnodearvvašvuođabálvalus ealáhussii go lea dárbu.
DBS fágakoordináhtor Halle Arnes oaivvilda dán guoktás lea dehálaš máhttu ja dasa lassin lea goappašiin nana čanasteapmi ealáhussii. Son lohka DBS-barggu boazodoalloealáhusas dárbbašlaš, ja lea čielggas dainna ahte ádjána eastadanbargguin bargat. Arnes jáhkká DBS-bargu boazodoalloealáhusas ja eanadoaluealáhusas lea givrodahkan goappaš ealáhusaide.
– Sáhttit olu doalvut eanadoaluealáhusas boazodoalloealáhussii ja nuppi guvlui. Eanadoallu lea eanet systematiserejuvvon, dan botta boazodolliin lea eanet máhttu ovdamearkka dihte aktiivvalaš geavaheapmái ATV ja muohtagielkkáin maid eanadoalu bealis sáhttet ávkin atnit, dadjá Arnes.
