-Almmuhus-
OĐĐASATGalgá šaddat álkit gávdnat rievttes sámi báike­namaid neahtas

Galgá šaddat álkit gávdnat rievttes sámi báike­namaid neahtas

-

-

Deatnu, Deanus vai Detnui? Neahtas sáhttá leat váttis gávdnat movt sámi báikenamat čállojit riekta. Dál leat Nationálagirjerádju, Wikimedia Norga ja Giellatekno ovttasbargamin njulget dán.

Erohussan dárogielas sáhttet sámegielat báikenamat sojahuvvot máŋgga ládje. Dárogillii «Tana» sáhttá sámegillii leat sihke Deatnu, Deanus ja Detnui. Dat lea leamaš hástaleaddji sihke Kártadoaimmahahkii ja earáide geat ohcet báikenamaid interneahtas.

– Báikenamat leat dehálaš oassi sámi kulturárbbis. Dat sáhttet sisttisdoallat dieđuid sogaid ja olbmuid birra geat gullet báikkiide. Mii doaivut ahte dat bargu man mii dál bargat, galgá sihkkarastit ahte dat namat seilot sámegielas, dadjá Nationálagirjeráju seniorráđđeaddi Jon Arild Olsen.

Ođđa ovttasbargoprošeavttas galgá Giellatekno buvttadit listtu buot málliid sámi báikenamain mat dasto šaddet almmusin Wikidatas (Wikipedia) ja Nationálagirjeráju giellabáŋkkus. Go dát listtut doibmii biddjojit, de sáhttá juohkehaš ohcat báikenamaid buot sojahanvugiin ja gávdnat rivttes geográfalaš báikki.

Stáda kártadoaimmahat lea positiiva dan prošektii.

– Min mielas lea dehálaš lasihit sámi báikenamaid beasatlašvuođa, sihke Guovddáš báikenammaregistaris (SSR) ja eará gálduin. Dát mielddisbuktá lasihuvvon máhtu ja daid namaid geavaheami, dadjá SSR vuogádatvásttolaš Kjetil Ringen.

-Almmuhus-