-Almmuhus-
OĐĐASATGalgá leat nihttán ja illastan moarsi máná čalmmiid ovddas

Galgá leat nihttán ja illastan moarsi máná čalmmiid ovddas

-

-

Lagabui 60-jahkásaš Sis-Finnmárkku almmái lea áššáskuhtton go galgá doaruhan ja nihttán moarsi. Veahkaváldin galgá leat geavvan sudno máná čalmmiid ovddas. 

Almmái lea áššáskuhtton go galgá rihkkon ráŋggáštuslága § 282  mii lea áitta, veahkaváldin dahje eará gudnehuhttin, duođalaš dahje máŋgii illastan su dálá dahje ovddeš guoimmi. 

Áitán čuohppat oaivvi eret

Áššáskuhttimis boahtá ovdan ahte veahkaváldin iežas ovttasássi vuostá galgá leat geavvan diimmá jagis. Almmái lea earret eará áššáskuhtton go galgá leat máŋgii časkán moarsi oaivái ja ámadadjui earret eará metálla ginttaljulggiin, nu ahte nisu manai galmmasin. Nisu fertii goaruhuvvot maŋŋá dán dáhpáhusa ja son buohccindieđihuvvui veahkaválddi geažil. Veahkaváldi galgá dáhpáhuvvan sudno gándda čalmmiid ovddas.

Son galgá maid psyhkalaš veahkaválddi geavahan moarsi vuostá gos máŋgii galgá dulbmon su njálmmálaččat ja leamaš uhkádussan nissonii, almmái galgá earret eará gohččodan moarsi fasttes sániiguin. Dievdu lea maiddái áššáskuhtton, go galgá leat nihttán roavvát sorbmet moarsis ja beaskidit báljisin vai ii galgan hámálaš dahje sullasaččat. 

Mánás loavkidan

Almmái lea maid áššáskuhtton dagahan veahkaválddi eará olbmo vuostá dahje fysalaččat loavkidan su go galgá hoigadan iežas máná nu ahte son gahčai eatnis ala gii lei veallut láhttis veahkaváldima geažil.

Ii doalahan gildosa 

Almmái lea maid áššáskuhtton go galgá leat rihkkon guossegildosa go lea váldán oktavuođa nissonin. Son galgá ožžon soames bearašlahtu sáddet SMS čállosa nissonii mas almmái hástalii nissona ja loahpahii vel čállosa váimmu ja mojunjálmmi govain.  

Juhkanoaivvis vuodján

Lassin lea almmái vel áššáskuhtton vuodján juhkanvuođas.  Diibmá geasset son vujii mohtorfievrruin vaikke sus lei badjel 0,2 promilla alkohola varas. 

Diggi

Diggi lea geassemanu gaskamuttus Álttá diggegottis. Áššái leat várrejuvvon guokte beaivvi. 

-Almmuhus-