Guovdageainnu suohkan galgá dán mánu virgádit soapmása gean bargun lea koordineret nuoraid bargguid ja veahkehit sin.
Guovdageainnu suohkan galgá dán mánu virgádit soapmása gean bargun lea koordineret nuoraid bargguid ja veahkehit sin.
Guovdageainnu suohkan lea ožžon njeallje bargoohcama nuoraid koordináhtora virgái.
– Dát gal várra lea dábálaš lohku. Muhtun virgái bohtet ollu ohcamušat, nu mo oahpaheaddjevirgái bohtet ollu ohcamušat, vástida Guovdageainnu suohkana kultuvrra ja bajásšaddama ovttadatjođiheaddji Bodil Utsi Vars.
Ii leat seamma go nuoraidklubba
Ovdal lea Guovdageainnus leamaš Nuoraidklubba, muhto suohkanis čilgejit ahte nuoraid koordináhtoris galget eará doaimmat.
– Dát virgi galgá muđui ge koordineret nuoraid bargguid, ja leat veahkkin nuoraide. Ovdamearkka dihte jus nuorat háliidit ohcat doarjaga prošektii, de nuoraid koordináhtor galgá de veahkehit čállit prošeaktaohcama.
Suohkana áigumušaid mielde nuoraid koordináhtor galgá leat olámuttus nuoraide.
– Mii rahpat nuoraidviesu gos galgá dán bargi bargosadji. Muhto dat mii lea nuoraidviessu lea jurddašuvvon deaivvadanbáikin nuoraide gos nuorat ieža besset mearridit rabasáiggiid ja doaimmaid, loahpaha Bodil Utsi Vars.
Dáhton goas rahppo Nuoraidviesu ii leat vel mearriduvvon.
