Elin Kåven galgá dán vahkkoloahpa čuojahit ovtta Eurohpá stuorámus World/folk musihkkafestiválain.
Elin Kåven galgá dán vahkkoloahpa čuojahit ovtta Eurohpá stuorámus World/folk musihkkafestiválain.
Elin Kåven galgá doallat guokte konseartta Rudolstadt Festiválas Duiskkas, ovttas musihkkáriiguin Espen Wensaas (cittern) ja Daniel Lazar (fidjol). Konsearttat leat bearjadaga 7. beaivvi ja lávvordaga 8. beaivvi suoidnemánus. Festiválii vurdojuvvot 100.000 guossi vahkkoloahpas.
– Dat lea hirbmat gelddolaš festivála beassat čuojahit, ja lea okta dain stuorámus dán suorggis olles máilmmis. Mus lea guhká leamaš miella dáppe čuojahit, lohká son.
Jorgalan teavsttaid
– Mii galgat maid leahkit mielde ovtta oktasaš konsearttas sotnabeaivvi, gos máŋga artista geat leat mielde festiválas čuojahit «cover»-lávlagiid Skohttalaš poehtas, Robert Burns. Mun lean jorgalan su teavsttaid sámegillii go festivála lea bivdán mu dan dahkat, ja galget dan konsearttas ovdanbuktot, lohká Kåven.
Báikkálaš konsearttat
Maŋŋelaš dán geasi galgá son doallat intiima-konsearttaid báikkálaš festiválain Finnmárkkus. Suoidnemánu 24. beaivvi čuojaha son «Langfjordagan» doaluin Lákkovuonbađas Álttá suohkanis, ja 27. beaivvi ges «Kunesdagan» doaluin Gussanjárggas, Davvesiidda gielddas.
