Ráđđehus dieđiha ahte varasguolleortnet joatkašuvvá gitta juovlamánu guđát beaivái.
Ealáhus- ja guolástusdepartemeantta ministtar Odd Emil Ingebrigtsen muitala ulbmil varasguolleortnegiin lea bisuhit guolástusealáhusa doaimmaid jođus go ii leat dorskebivdoáigodat, čállá departemeanta preassadieđáhusas.
Ortnet mielddisbuktá ahte fatnasat, mat buktet nannámii varas guoli, ožžot stuorát guolleeari go dan dahket. Ortnet joatkašuvvá juovlamánu guđát beaivái ja guolleeari bonus lasihuvvui 30 prosentii.
– Varasguolleortnet buktá buoret einnosteami guolleindustriijai ja sihkkarastá varasguoli márkanii. Buoridan dihtii dán jagi guolásteami, viiddidat dál dán ortnega. Juovlamánus árvvoštallat dan fas, jus orru dárbu dan dahkat, lohká guolástus- ja áhpeborramušministtar Odd Emil Ingebrigtsen.
Muitala dan leat Báhcavuotna, Oarje-Finnmárkkuráđđi, Sjømatbedriftene ja earát ohcalan.
Jagi 2020:s várrejuvvui 15 270 tonna guolli varasguolleortnegii. Go muddejedje jagi 2019 ortnega badjelmeari guolásteami, de šattai loahpalaš guolleearri 13 586 tonna. Álggaheapmi lei cuoŋománu 13. beaivvi ja guolleeari bonus lei logi proseantta. Bonus lasihuvvui 30 prosentii suoidnemánu 13. beaivvi. Jus ortnega bokte eanet guolli bivdojuvvo, de gokčá ealliguollevuorkká earis ja gessojuvvo 2021 Norgga dorskeearis.
