Gáldu – Álgoálbmotvuoigatvuođaid Guovddáš lea bovden Ásia álgoálbmogiid oktasašsearvvi Asia Indigenous Peoples Pact (AIPP) Guovdageidnui álggahan dihte ovttasbarggu.
Gáldu – Álgoálbmotvuoigatvuođaid Guovddáš lea bovden Ásia álgoálbmogiid oktasašsearvvi Asia Indigenous Peoples Pact (AIPP) Guovdageidnui álggahan dihte ovttasbarggu.
AIPP bealis leat dál guokte ovddasteaddji boahtán Guovdageidnui deaivvadit Gálduin.
– Gáldu lea bovden AIPP ovttasbargui go mii oaidnit ahte sii barget erenomáš buori barggu. Sii leat ráhkadan olu diehtojuohkinbuktagiid ja filmmaid maid mii háliidivččiimet heivehit nu ahte dat sáhttet geavahuvvot skuvllain dáppe Sámis. Gáldu háliida ovttasbarggu boahtteáiggis man bokte mii fárrolagaid nannet diehtojuohkima sámi ja álgoálbmotvuoigatvuođaid birra, dadjá Gáldu direktevra Láilá Susanne Vars.
Nanu organisašuvdna riikkaidgaskasaččat
AIPP lea hui nanu álgoálbmotorganisašuvdna mii lea olu jagiid jo bargan álgoálbmotvuoigatvuođaid nannemiin riikkaidgaskasaččat.
Asia Indigenous Peoples Pact (AIPP) lea regiovnnalaš searvi mii álggahuvvui 1988:s. Sis leat juste dál 47 miellahttosearvvi 14 iešguđetge riikkas Ásias. Sin searvi lea organiserejuvvon nu ahte sis leat 14 bajitdási searvvi, 15 guovlludási searvvi ja 18 báikkálaš searvvi lahttun. Guhtta searvvi leat álgoálbmotnissoniid searvvit ja njeallje fas sierra nuoraid searvvit. AIPP sáttagotti jođiha Joan Carling, gii lea AIPP váldočálli/jođiheaddji, ja guhte lea vel ON Bistevaš ÁlgoálbmotForuma áššedovdi lahttu.
