-Almmuhus-
-Almmuhus-
KULTUVRAGáldu bovde giđđalodden kafeai

Gáldu bovde giđđalodden kafeai

-

-

Jurdda lea boktit ságastallama sámi vuoigatvuođaid birra dakkár kaferáidduin.

Gáldu háliida olahit eanebuid iežas doaimmaiguin, ja ásaha áibbas ođđa kaferáiddu mii galggašii šaddat gulahallan-arenan gosa buohkat leat bures boahtin.

Jurdda deaivvademiin lea oažžut eanet ságastallama sámi servodagas sámi vuoigatvuođaid birra. Nu čállá lágideaddji Gáldu facebookas gos bovde olbmuid boahtit rabas kafeai.


Gáldu direktevra Laila Susanne Vars. Vuorkágovva: Astrid Helander.

Ságastallet giđđaloddema birra

Kafeas muitala Gáldu riikkaidgaskasaš konvenšuvnnaid birra maid Norga lea vuolláičállán ja mat suddjejit sámi kultuvrra ja sámi eallinvuogi. Dasto muitala Sten Olav Hætta Sámedikki hálddahusa bealis veahá sin barggu birra giđđaloddenáššis. Nuorra loddejeaddji, Nils Ole Skum galgá maid muitalit manne giđđalodden lea sutnje dehálaš.

Dan maŋŋil háliida Gáldu ahte olbmot servet ságastallamii giđđaloddema birra, erenoamážit háliidit ságastallama daid lágaid ja njuolggadusaid birra mat otne stivrejit giđđaloddema Guovdageainnus. Gáldus lea hállu gullat maid olbmot jurddašit dan birra ja movt sámi árbevierru ja Norgga láhka heiveba oktii. Gáldu háliida dáid dieđuid geavahit diehtojuohkinbarggus nannen dihte ipmárdusa sámi vuoigatvuođaid birra stuora servodagas.

 

Vuosttaš ságastallankafea

Kafeat leat rabas buohkaide, ja dán háve sávvá Gáldu erenoamážit bures boahtima loddejeddjiide ja giđđaloddenberošteddjiide. Vuosttaš ságastallankafea šaddá Guovdageainnus, Alfreds Kroas geassemánu 16.6.15 dii 1800 ja čoahkkingiella lea davvisámegiella.

-Almmuhus-