Vuorrasit olbmuin galggašii unnimusat 24 gráda viesus, oaivvilda UIT-professor emeritus.
Jus leat nuorra ja dearvvaš, de várra gierddat veaháš galbmasit temperatuvrrain orodit, muhto vuorraset olbmot ja olbmuin, geain lea várra váibmovigi oažžut, galggaše lieggasit temperatuvrrain orodit.
Galbma, goike dálveáibmu sáhttá váikkuhit immunsuodjalussii ja dutkit oaivvildit galbma áimmu váikkuhit dainna lágiin ahte varrajohtu njuni čađa hedjona, ja nu šaddet maiddái unnit immunseallat mat vuostálastet infekšuvnnaid.
Norgga árktalaš universitehta (UiT) professor emeritus Jamec Mercer lea dutkan dan fenomena máŋga jagi, sihke Davvi-Norggas ja eará riikkain.
– Mađi boarraseabbon olmmoš šaddá, dađi eambbo rievdá rumaš ja nu šaddá maid váddáseabbon birgehallat galbmasis. Vuorrasit olbmuin lea heajut ávnnasmolsun, unnit deahkit ja oallugiin lea maid unnit rumašbuoidi. Vuorraset olbmot lihkadit maid unnit eai ge nagot álot doarggistit. Muhtun vuorasolbmot eai fuomáš liikká jođánit šat ahte galbmojit, dadjá professor emeritus James Mercer forskning.no:i.
