Nuoraidfitnodat Reŋko UB mii lei mielde riikkaidgaskasaš nuoraidfitnodat gilvvus Rigas, beasai njealji buoremusaid searvái.
Nuoraidfitnodat Reŋko UB mii lei mielde riikkaidgaskasaš nuoraidfitnodat gilvvus Rigas, beasai njealji buoremusaid searvái.
– Doppe ii muitaluvvon juste galládin mii beasaimet, muhto čurvojuvvui ahte Reŋko UB lei njealji buoremusaid searvvis. Gal dat lei máilmme somá, muitala Olav Sara Nikkinen.
Birgen bures
Sara Nikkinen lea Kárášjoga Sámi joatkkaskuvlla Teknihkka- ja Industriijafága oahpaheaddji, dán fága oahppit dat leat ge ásahan nuoraidfitnodaga Reŋko UB.
Fitnodat lea hábmen ja ráhkadan njuovvanreŋko, ja dáinna buktagiin sii leat birgen bures dán rádjai.
Sii šadde maiddái nubbin buoremussan logo gilvvus ja goalmmádin buoremussan nuoraidfitnodat gilvvus.
99 oassálasti
Nuoraidfitnodaga beaivválaš jođiheaddji Nils Samuel S. Anti ja nubbinjođiheaddji Mathias Vassvik Kalstad dat ovddasteigga Reŋko UB, International Student Company Festival 2016 gilvvus mii lágiduvvoi Rigas, Latvias.Gilvvus oassálaste 99 nuoraidfitnodaga mat bohte 17 riikkas, ja de gal máhttá oahpaheaddji leat rámis go gánddat nie bures lihkostuvaiga.
– Soai leigga hirbmat čeahpit, eŋgelasgillii muitaleigga fitnodaga ja buktaga birra juryii, ja muhtin juryláhttut galledeigga sudno čájáhusa máŋgii, čilge oahpaheaddji.
Ávvir ii leat fáhten beaivválaš jođiheaddji ja nubbin jođiheaddji ságaide, muhto oahpaheaddji guhte maiddái čuovui gándda guoktá Rigas muitala iežas jáhkkit gánddaid lihkostuvvat go leat nu viššalat.
– Olles luohká leat leamaš hirbmat áŋgirat ja viššalat, eai dušše hui áŋgirat muhto hirbmat. Dasa lassin leat maid bures bagaduvvon mo galget fievrredit fitnodaga. Sii leat čavčča rájes hárjehallan mo galgá ovdanbuktit buktaga, muitala Sara Nikkinen.
Norggameašttir gilvvuide moatti vahku geahčen
Vaikke dál leat ge leamaš riikkaidgaskasaš gilvvuin, de gánddat eai beasa gal vuoiŋŋastit menddo guhká. Loahpageahčen cuoŋománu galget oainnat oassálastit nuoraidfitnodagaid Norggameašttir gilvvuin Lillehammeris. Oahpaheaddji ii loga duostat einnostit mo doppe manná, vaikke Rigas birgejedje ge bures:
– Dat lea ban váttis einnostit, sáhttá mannat bures ja sáhttá mannat hejot. Lea vuos gitta das makkár beliid jury árvvoštallá, muhto jáhkán sin árvvoštallat seamma áššiid go Rigasge. Min gánddain lea hui erenoamáš buvtta, ja bealistan lean hirbmat movtta go lihkostuvvet.
