Vibeke Larsen sártnui odne vuosttaš geardde sámegillii. Geahča oasáža dás:
Vibeke Larsen sártnui odne vuosttaš geardde sámegillii. Geahča oasáža dás:
Odne diibmu 11.30 rahppojedje Tråante 2017 ávvudoalut.
Sártnui sámegillii
Rahpamis dolle suomabeale, ruoŧabeale ja norggabeale sámediggepresideanttat sártniid.
Vibeke Larsen, gean olusat moite go ii doallan ođđajagisártni sámegillii, sártnui dál vuosttaš geardde sámegillii.
Go sárdnugođii sámegillii, de olbmot biškugohte ja spežžo gieđaid.
– Odne lea sámi álbmot čoahkkanan fas Troanddimii, gos vuosttaš sámi čoahkkin lágiduvvui 100 jagi áigi. Mun lean ilus go buot sámedikkit leat dál deike čoahkkanan, logai Larsen earret eará.
Sártnistit logai olu ovdánan maŋimuš 100 jagis, son namuhii maid giela dehálašvuođa.
– Gal dat lei issoras!
Ávvir háleštii Larseniin maŋŋil sártni:
– Dat lei issoras, muhto manai bures, lohká son.
Son muitala ožžon sártni loahpageahčen ođđajagimánu, son ii leat ieš čállán sártni dan lea hálddahus dahkan ja sámediggepresideanta ges lea dohkkehan dan.
Dan rájes lea hárjehallan ruovttus.
– Mun lean hárjehallan iežan mánáiguin, mus leat golbma máná geat leat váldoduopmárat ja de lean hárjehallan Roger Østbyain (journ. meark. Sámedikki gulahallanhoavda), čaibmá ieš.
(Ášši joatká gova vuolábealde)
Govven: Berit Marie Lise Eira
Dehálaš čalmmustahttin
Larsen lohká otná beaivvi leat dehálažžan.
– Mii beassat čalmmustahttit 100 jagi ávvudeami, mii beassat ivdnet Troanddima, doalut sáddejuvvot tv bokte ja mun sávan dát sáhttá Norgga álbmoga čuvgehit dan ektui ahte mis lea maid sámi álbmot Norggas, lohká son.
Muhtimat lohket ahte sápmelaččat dál ain digaštallet daid seamma áššiid, maid digaštalle jo 100 jagi dassái, dan mieđiha maiddái sámediggepresideanta:
– Jua, muhto gal mii leat maid olu ovdánan dan rájes, oaivvilda son.
– Jus lea okta ášši mainna oaivvildat ahte eat leat vuos nu bures ovdánan, man de namuhivččet?
– Vuosttažettiin de lea oččodit albma sámegieloahpahusa. Min ulbmil lea oažžut eanet giellaguddiid, ja oažžut albma sámegielarenaid mat leat lassin mánáidgárddiide ja skuvllaide, lohká Larsen.
