-Almmuhus-
OĐĐASATGáivuotna háliida Supmii skeŋket vári

Gáivuotna háliida Supmii skeŋket vári

-

-

Gáivuona sátnejođiheaddji háliidivčče skeŋket várrečohkka Supmii. Stuoradikkis imaštallet evttohusa.

Oslo (NTB): – Ii leat vejolaš čuovvolit dákkár evttohusa, ii dál, ii ge maŋŋelaš, lohká Stuoradikki dárkkistan- ja konstituerenlávdegotti nubbinjođiheaddji Michael Tetzschner Aftenpostenii.

 

Veterána Stáda Kártadoaimmahagas Bjørn Geirr Harsson, lea árvalan addit Supmii dan alimus oasi dan guovtti Háldi várrečohkain mat leat Gáivuona suohkanis Romssas. Várri galggašii leat skeaŋkan Suoma 100 jagi iešmearridanávvudeapmái.

 

Addit dan alimus oasi

Lea areála mii lea 0,01 kvadráhtakilomehter stuoris. Háldi várri lea sihke Suoma ja Norgga bealde ráji. Oassi váris mii lea Norgga bealde lea čieža mehtera alit go dat mii lea Suoma bealde. Alimus oassi lea 1331 mehter badjel meara ja lea Norgga bealde.

– Norga juohká Nobela ráfibálkkašumi, ja galggaše maid leat ovdagovvan ránnjáriikkaide, muitalii Harsson NRKii ovdalaš beassážiid.

 

Máŋggas dorjon evttohusa

Gáivuona sátnejođiheaddji Svein Oddvar Leiros ja eará politihkkarat suohkanis leat sádden reivve stáhtaministarii ja sihtet doarjut várrečohka skeŋkema ránnjáriikii. Máŋggas dorjot dán evttohusa Facebook joavkku bokte «Halti som jubileumsgave» (sám: Háldi ávvuskeaŋkan). Joavkkus leat jo badjelaš 13.000 miellahttu.

 

Cuoŋománu-leaika

Olgoriikadepartemeanta lea dieđihan Harssonii ahte evttohusa ii leat vejolaš dohkkehit go Norgga Vuođđolágas čuožžu ahte Norgga ii sáhte juogadit.

– In nagot baljo guođđit dan dovddu ahte dá lea dušše cuoŋománu-leaika mii lea beare árrat almmuhuvvon, muitala Tetzschner Aftenpostenii. (©NTB)

-Almmuhus-