-Almmuhus-
-Almmuhus-
OĐĐASAT Gáivuotna: - Gelddolaš válga

Gáivuotna: – Gelddolaš válga

-

-

Eline Petrine Johansen (42) lea Gáivuona suohkana jienasteaddji. Su mielas lea gelddolaš suohkanválga dán jagi.

Maŋemus njeallje jagi lea Guovddášbellodaga sátnejođiheaddji Svein Oddvar Leiros stivren Gáivuona suohkana. 

– Dál lea gelddolaš oaidnit šaddá go seamma sátnejođiheaddji gii jođiiha Gáivuona gieldda, dadjá jienasteaddji Eline Petrine Johansen

Son bargá Dálošvákki Kulturviesus gos okta Gáivuona jienastanbáikkiin leat. 

– Orru stuora beroštupmi dan jagáš válgii, olbmot leat beaivvi miehtá fitnan dáppe jienasteamen, ja dát lea dušše okta jienastanbáikkiin dán suohkanis, dadjá son. 

 

Jáhkká Birasbellodaga birget bures


Jienasteaddji Eline Petrine Johansen. Govven: Bernt Snorre Johansen

Gáivuona gielddaválggas leat guhtta bellodaga dán jagáš gielddaválggas, dat leat Birasbellodat Ruoná, Bargiidbellodat, Ovddadusbellodat, Guovddášbellodat, Olgešbellodat ja Risttalaš Álbmotbellodat. 

– Mun gulan ahte ollusat leat jurddašan jienastit Birasbellodaga. Danin mun jáhkán ahte Birasbellodagas šaddá buorre válgaboađus dán válggas. Birasbellodat lea olu bargan dán jagi maid sámiide dáppe. De lea maid gelddolaš oaidnit mot Bargiidbellodagain manná dáppe. Sin sátnejođiheaddjeevttohas, Bernt Eirik Isaksen Lyngstad, lea ovdal čohkkán gielddastivrras, muitala Johnson.

Eline Petrine meidne maid ahte juohke bellodagas Gáivuonas lea muhtin sámi sisdoallu válgaprográmmas.

– Dáppe Gáivuonas galgá sámi sisdoallu, eará livččii veadjetmeahttun, dadjá son. 

 

Luossabiepmahagat guovddážis

Eline Petrine Johansen čilge ahte Gáivuona suohkana bellodagat beroštit olu luossabiepmahagain ja daid hálddašeamis ja ahte lea olu sáhka das ahte galget go stuoridit ja hukset eanet biebmoluosaid Gáivutnii. 

– Dat mearkkaša ahte šattašedje bargosajit, muhto maid nuoskkidit min luonddu ja meara dáppe ja dagahit ahte eará guolit jápmet. Nu ahte dan birra lea digaštallan dáppe Gáivuonas, dadjá son. 


Jienasteaddji Lise Nilsen manname sisa válgabáikái Dološvákkis Gáivuona suohkanis. Govven: Eline Petrine Johansen

 

Dušše okta listu girkoválggas

Gáivuona girkoválggas lea dušše okta listu man sáhtta jienastit. 

Eline Petrine čilge maid ahte son lea jurddašan olu Gáivuona girkoválgga birra ja go ii gávdno go okta listu man sáhttá jienastit.

– Mun duođas sávan ahte boahtte girkoválggas leat eanet go dušše okta listu dáppe. Mun maid sávan ahte šaddá eanet ságastallan das makkár báiki girkus galgá servodagas.

Son meidne ahte leat olu buorit olbmot dan jágaš girkoválgga listtus, muhto ahte ii álo lea seamma árvovuođu jurdagat buohkain nu go sus. 

– Dál ferte leat ipmilbálválus jus girkus galget doalut. Mun, gii barggan kulturskuvllas, vásihan ahte mii eat sáhte doallat ovdamearkka dihtii konsearttaid girkus. Mun sávan ahte livččii eanet rabasvuohta girkus ja ahte girku livččii rabas buot oskkuide ja buot olbmuide.

Son lohká maid dovdata ahte Gáivuonas leat nissonbáhpaid vuostá ja vuosteháhku vihahit seamma sohkabealat olbmuid náittosdillái.

– Mun sávan ahte livččii earáládje, muhto go lea dušše okta listu, de ii sáhte rievdadit maidege, dadjá Eline Petrine Johansen.

- Advertisement -
-Almmuhus-