Leena Olsen lea virgáduvvon Gáivuona suohkanii nuoraid oktavuođaolmmožin.
Frank Haugseth luobai nuoraidoktavuođaolmmošvirggis jahkemolsumis.
– Mii leat ilus go leat ožžon Leena Mánáid ja Nuoraid Teamii. Ovttas galgat mii nannet mánáid- ja nuoraidbarggu, čállá Gáivuona suohkan neahttasiiddus.
24-jahkásaš Leena Olsen lea bajásšaddan Gáivuonvákkis. Son lohká suohkana neahttasiiddu čállosis ahte su váldomihttun dán barggus lea oažžut oktavuođa nuoraiguin, oahpásmuvvat singuin ja geahččalit duohtandahkat sin sávaldagaid. Son lohká vel ahte áigu galledit skuvllaid ja asttoáiggeklubbaid čájehan dihte nuoraide ahte son lea olámuttos ja vai nuorat oahpásmuvvet suinna.
