Niklas Labba lea virgáduvvon Gáissi giellaguovddáža ođđa jođiheaddjin.
Labba ja vihtta nissona ledje ohcan virgái. Labba oaččui barggu ja lea virgáduvvon dál ođđa jođiheaddjin.
Ámmát almmái
Maŋimuš njeallje jagi lea Labba jođihan Sámi dutkamiid guovddáža. Labba jođihii Sámedikki giellahálddašan- ja politihkkajuhkosa ovdal go álggii UiT Norgga árktalaš universitehtii. Son lea máŋga jagi bargan dutkin ovddeš Sámi Instituhtas ja Romssa universitehtas. Dasa lassin lea son bargan sámi áššiiguin Árktalaš Ráđis ja Ovttastuvvan našuvnnain.
Jođihan stuorebuš dutkanprošeavttaid
Niklas Labba lea bajásšaddan Badje-Sohpparis rádjerasttildeaddji boazodoalus, ja su siiddas lea geasseorohat Dieváidvuovddis Sis-Romssas. Su fágalaš duogáš leat čadnon erenoamážit árbevirolaš dihtui, boazodollui ja ekonomiijii. Son lea universitehtas ovdal jođihan ja oassálastán stuorebuš eurohpalaš dutkanprošeavttain mat leat guoskan sámi ja eamiálbmotjearaldagaide ja dálkkádatrievdadusa hástalusaide.
Labba virgáduvvui borgemánu álggus jođiheaddjevirgái. Ovddeš jođiheaddji Karin Mannela lea jođihišgoahtán Giellasiidda Gáivuonas.
Ohcciidlistu:
Liv Eli Gaup, Romsa/Guovdageaidnu
Sollaug Sárgon, Guovdageaidnu
Marie Kvernmo, Áltá
Marit Berit Eira, Romsa
Niklas Labba, Romsa
Karen Anette Anti, Beardogorži
