-Almmuhus-
-Almmuhus-
-Almmuhus-
OĐĐASATGáibidit rektoriid virgáduvvot ja fylkkamánnis oažžut veahki 

Gáibidit rektoriid virgáduvvot ja fylkkamánnis oažžut veahki 

-

-

Guovdageainnu suohkana politihkkárat gohččo suohkana virgádit rektoriid, sosiálaoahpaheaddji ja bovdet fylkkamánni boahtit bagadit rutiinnaid ja struktuvrraid birra.

Guovdageainnu suohkana doaibmi sátnejođiheaddji Anders S. Buljo gohčui duorastaga politihkkáriid hoahppočoahkkimii gos digaštalle Máze ja Guovdageainnu mánáidskuvllaid rektor, oahpaheddjiid ja ohppiid dili birra. Hoahppočoahkkin lei duorastaga, diibmobeali lei čoahkkin rabas álbmogii, muhto dan maŋŋá giddejedje čoahkkima go galge gieđahallat personálaáššiid.

Virgádedje

Čoahkkimis ledje ráđđealmmái Kent Valio, kultuvra ja bajásšaddanossodaga suohkanjođiheaddji Bodil Utsi Vars ja suohkana ovdagotti politihkkárat.  Valio ja Vars, suohkana bealis, čilgiiga álggos mo dilli lea, ovdal politihkkárat gažadedje sudno.

Valio muitalii ahte Guovdageainnu mánáidskuvllas lea sadjásašrektor sajis, muhto Mázes eai leat vuos virgádan sadjásačča. Ii oktage sis, geat dássážii leat jerron leat váldán vuostá virggi.

– Rektor Máze skuvlii ii leat vuos konstituerejuvvon, muhto galgá jođáneamos lági mielde konstituerejuvvot. Konstitueren lea gaskaboddosaš go goappašat rektorvirggit leat fas almmuhuvvon rabasin. Orru ahte dilli čovdojuvvo. Ella Eira lea juo konstituerejuvvon Guovdageainnu skuvlii ja Inger Biret Sara ges galgá konstituerejuvvot Mázii. Sara lea doaibman gaskaboddosaš rektoriin Mázes, muhto dál galgá ollesáiggi leat doppe, dadjá Guovdageainnu suohkana doaibmi sátnejođiheaddji Anders S. Buljo.

Ruđas unnán mearkašupmi

Bodil Utsi Vars muitalii, nugo ovddežis čuoččuhan Ávviris, ahte rektoris lea menddo olu bargu bálkká ektui, danin guđđet virggi.

Ráđđeolmmái evttohii virgádit sosiálaoahpaheaddji, vai rektoris šattašii geahppaset árgabeaivi. 

Bovdet Fylkamánni

Doaibmi sátnejođiheaddji Anders S. Buljo ja  politihkkárat dorjo evttohusa, ja háste ráđđealbmá virgádit sosiálaoahpaheaddji.

Oktasaš áddejupmi

Várresátnejođiheaddji lohká ráđđeolbmás lei buorre čilgehus dili birra, muhto čuožžilit gažaldagat go dilli lea šaddan nugo lea.

– Bođii ovdan ahte rutiinnat leat sajis, muhto leat go struktuvrrat nu ahte rutiinnat doibmet. Dat lei okta guovddáš gažaldat ovdagottis. Mun lean ovddalgihtii hupman fylkkamánniin ahte boađášii go bagadit min skuvlla ja muitalit struktuvrra birra. Mis galget leat sajis buori struktuvrrat ja rutiinnat, ja sii leat lohkan ahte sáhttet veahkehit. Dat lea dehálaš ahte jođiheddjiin ja oahpaheddjiin lea oktasaš ipmárdus das mo ovdamearkkadihtii galgá reageret go áššit álget boahtit oidnosii. Nu ahte ráđđealmmái viežžá bagadallama fylkkamánnis, dadjá Buljo.

Luohttámuš

Guovdageainnu suohkana doaibmi sátnejođiheaddji Anders S. Buljo dadjá ahte hálddahus nagoda sihkkarit čoavdit áššiid, muhto sii háliidit olgguldas olbmuid čoavdit daid. Dat addá oadjebasvuođa, erenomážit váhnemiidda.  

– Mus lea vuordámuš ahte lea buorre gulahallan váhnemiiguin dan barggus. Mii háliidit ahte min systema doaibmá.

–  Mis lea luohttámuš hálddahussii, ja hálddahusa bealis leat mielas oažžut bagadallama fylkkamánnis. Go dát barggut leat čađahuvvon de vuordit bistevaš čovdosa, struktuvrra mii doaibmá rutiinnaid ektui ja stabiila jođiheame. Mii bargat dan nala ahte mis galget leat buorit skuvllat Guovdageainnu suohkanis, gos lea oadjebasvuohta, buorre biras ja oahpahus ja dasa ii galggašii leat eahpádus, dadjá Buljo

Buollái oalle kriisa go rektor celkkii eret iežas virggi beaivvát ala mannan bearjadaga.

Dát lea viđát rektor gii oanehisáiggis guođđá rektor virggi Guovdageainnu mánáidskuvllas.

Suohkana hálddahus oaivvilda ahte rektoris lea beare olu bargu bálkká ektui, ja nu eai nagot doalahit Rektoriid mánáidskuvllas.

Oahpaheaddjit fas sivahit heajos hálddahus barggu, ja čájehedje vuosttehágu čáhppes Facebook profiilagovain ja duogážis vel govva mánáidskuvllas. 

Váhnemat leat reageren ja sádden reivve mas gohččot čorget moivvi, vai mánáiguin ja oahpaheddjiin lea buorre árgabeaivi skuvllas.

-Almmuhus-