-Almmuhus-
OĐĐASATGáibidit Ráđđehusa nannet kvenagiela

Gáibidit Ráđđehusa nannet kvenagiela

-

-

Norgga Giellanuoraid jođiheaddji Synnøve Marie Sætre gáibida ráđđehusa nannet kvenagiela nu ahte oččošii seamma vuoigatvuođaid go sámegiella.

Sihke Tromssa ja Finnmárkku fylkkadikkit leat mearridan loktet kvenagiela II dásis III dássái Eurohpalaš guovllu- dahje unnitlogugielaid lihttus. Dál gáibidit Norgga Giellanuorat ahte ráđđehus čuovvola dan ja meannuda loktet kvenagiela III dássái.

 – Dál lea áigi kvenagiela stáhtusa loktet dan dássái man ánssáša, ja dan mii áigut čalmmustahttit dál go Kvena Giellabeaivi lahkona, cuoŋománu 26. beaivvi, dadjá Norgga Giellanuoraid jođiheaddji Synnøve Marie Sætre.

 

Eai leat seamma vuoigatvuođat go sámegielas

Kvenagielas lea gehččojuvvon sierra giellan Norggas 2005 rájes ja lea dan rájes leamaš II dásis Eurohpálaš guovllu- dahje unnitlogugielaid lihttus.

 – Dát dassi dohkkeha kvenagiela, liikká das ii leat seamma vuoigatvuohta ovdáneapmái ja almmolaš geavaheapmái go sámegielas. Jus oččošii dakkár vuoigatvuođaid de dát giella masa rahčet rekrutteret giellageavaheddjiid, geavahuvvošii eanet, dadjá giellapolitihkkár.

 

Grammatihkka álkida

Ii leat nu guhkes áigi dassái go kvena grammatihkka ásahuvvui.

 – Grammatihkka nanne kvena geavahangiellan, ja álkida dan geavaheami ovdamearkka dihte hálddahusvuogádagas dahje oahpahusa dáfus. Šaddá vejolaš ráhkadit oahppogirjjiid kvenagillii ja oahpahit oahpaheddjiid kvena giela, kultuvrra ja historjjá birra, čilge Sætre.

 

Gáibidit Ráđđehusa váldit ovddasvástádusa

Kvena «gáibmegiella» Ruoŧas, meänkali, lea jo III dásis.

 – Ođđa grammatihkain leat Norgga kvenat ožžon dehálaš reaiddu mainna sáhttet seailluhit ja ovdánahttit eatnigielaset. Norgga Giellanuorat gáibidit Ráđđehusa váldit ovddasvástádusa Norgga kvenagielhálliid vuoigatvuođaid ja boahtteáiggi ovddas ja loktet kvenagiela III dássái, loahpaha Sætre preassadieđáhusa bokte.

-Almmuhus-