Naturvernforbundet gáibida ahte oalát gildojuvvo amas muorrašlajáid gilvima.
Dan cealká organisašuvdna gulaskuddan cealkámušas birasdirektoráhtii.
– Biraseiseválddit fertejit jođánit ásahit strategalaš plána mo jávkadit gárgiduvvon amas muorrašlájaid ja jávkadišgoahtit ekologalaš riskašlájaid gilvojuvvon vuovdái, oaivvilda Naturvernforbundet.
Birasdirektoráhta evttoha iežaset amas muorrašlájaid njuolggadusas ahte vuovdeealáhus galgá ain beassat gilvit ekologalaš váralaš muorrašlájaid vuovdeealáhusa atnui. Olu dáid amas muorrašlájaid maid vuovdeealáhus atná, nugo sitkaguossa ja lutzguossa, lea hirbmat stuorra riska gárggiidit norgalaš lundui, čállá Artsdatabankens fremmedartliste dahje šattuiddiehtobáŋku amasšattuidlisttus. Dát lea šattut mat levvet jođánit miehtá guovllu ja duvdet eret báikkálaš šattuid ja uhkidit maid luonddumáŋggabealatvuođa.
– Dán njuolggadusa ferte bálkestit. Birasdirektoráhta evttohusas eai váldde ovddasvástádusa ja lea vuostá min riikkaidgaskasaš geatnegasvuođa bissehit luonddu goarideami, lohká Naturvernforbundet dahje luonddugáhttenlihttu fágajođiheaddji Arnodd Håpnes preassadieđáhusas.
Áitá luonddumáŋggabealatvuođa
Amas šattut leat mielde goarideamen luonddumáŋggabealatvuođa máilmmiviidosaččat. Dát lea vuđolaččat čilgejuvvon Fremmedartslisten (2018) (amasšattolisttus). Dát váttisvuohta lea mielde ON luonddu panela beaiveprográmmas. Amas šattuid vahátváikkuhusat leat čilgejuvvon čielgasit Biomáŋggabealatkonvenšuvnnas, Aichi-ulbmil nummar 9:s. Håpnes gohčoda dáid «vuovddi ruoššaluossan». Håpnes ohcala eambbo gelbbolašvuođa áššis ja uhcit vuovdeberošteaddjiid miehtegulgii njávkama. Čilge dát amas muorrašlájat áitet gáhttejuvvon guovlluid, divrras luonddu ja šattuidmáŋggabealatvuođa.
– Luonddugáhttenlihttu ja eará searvvit čorgejit jahkásaččat dievva nuoskkideaddji amas muorrašlájaid. Muhto mii ávkái das lea go biraseiseválddit diktet eambbo amas muorrašlájaid gilvit, lohká Håpnes.