NBR lea dál geigen iežas gáibádusa stáhtii.
Norgga Boazosápmelaččaid Riikkasearvi (NBR) geigii iežaset gáibádusa boazodoallošiehtadussii áigodaga 2019-2020 gaskavahkku, ođđajagemánu 9. beaivvi.
Gáibádus lea 192,95 miljovnna ruvnno.
Diibmá gáibidii NBR 157 ruvnno, ja ožžo 123 miljovnna, 4,5 miljovnna lasáhus ovddit jagis, ja 5,5 miljovnna eambbo go maid stáhta álggos fálai.
Guokte jagi áige gáibidii ealáhusorganisašuvdna 143 miljovnna, ožžo 118 miljovnna, lassánii 4,1 miljovnnain.
– Addá buori vuođu árvvoštallat makkár ekonomalaš doaimmat leat dárbbašlaččat
Ságat čállá ahte NBR jođiheaddji Ellinor Marita Jåma deattuha ahte ii leat cealkámuš, muhto gáibádus, maid gaskavahkku leat geigen stáhtii, mas gáibidit measta 193 miljovnna ruvnno.
NBR lea mearridan nannet erenoamážit orohagaid barggu areálaáššiiguin ja láhkageatnegahtton bargguid. Dasa lassin áigu NBR nannet ortnegiid mat leat čadnon árrapenšuvdnii, čálgoortnegii, nissondoaimmaide ja HMS:i.
– NBR gáibádus čalmmustahttit dárbbuid mat boazodoalus leat addá buori vuođu árvvoštallat makkár ekonomalaš doaimmat leat dárbbašlaččat, dadjá jođiheaddji, Ellinor Marita Jåma preassadieđáhusas.
– Mu mielas lea erenoamáš dehálaš ahte mii dál bargat dan badjelii ja nannet čálgoortnega boazodoalus. Mii nannet maid siidaosiid ekonomalaččat maid nissonolbmot jođihit, maiddái daid siidaosiid mat goappašat beallelaččat/ovttasássit leaba eaiggádat, dadjá Ellinor Marita Jåma.
