– Industriijabáiki váldá atnui viiddis guovllu, 78 njealjádaskilomehtera, guovllus gos viidámus luondu lea gos eai leat visttit, cealká Norgga Luonddugáhttenlihttu ja gáibida prošeavtta bissehuvvot.
– Industriijabáiki váldá atnui viiddis guovllu, 78 njealjádaskilomehtera, guovllus gos viidámus luondu lea gos eai leat visttit, cealká Norgga Luonddugáhttenlihttu ja gáibida prošeavtta bissehuvvot.
Grenselandet AS áigu hukset stuora bieggamilloráhkkanusa Lágesduoddarii, ja prošeavtta namma lea «Davvi». Dál lea prošeakta dieđihuvvon Norgga čázádat- ja energiijadirektoráhttii (NVE) ja gulaskuddanáigemearri lea skábmamánnu 6. beaivi.
– Lea hirbmat geasuheaddjis guovlu guollebivdiide ja olbmuide geat beroštit meahcástallamis, ja lea hui lahka Rásttigáissá, sámi bassivári. Luonddugáhttenlihttu ii dohkket bieggamilluid guovllus gos goarádussan lea lundui, murjemiidda, boazodollui ja sámi kulturmuittuide, dieđiha Norgga Luonddugáhttenlihttu preassadieđáhusas.
Eai dovdda luonddušlájaid doarvái bures
– Árktalaš guovlu, ja Finnmárkku jeagge- ja duottarguovllut, šaddet eanet ja eanet hárvenaččat, sisabahkkemat leat ja dálkkádatrievdamat, cealká lihttu ja lohká ahte luonddušlájat eai leat doarvái bures kártejuvvon go huksejeaddji čuoččuha dieđáhusas ahte guovlu lea guorbbas ja leat unnán luonddušlájat.
– Luonddumáŋggabealatlágas čuožžu čielgasit várrugas-prinsihppa ja ahte huksejeaddji ii sáhte váilevaš gelbbolašvuođain čuoččuhit ja álggahit roggamiid luonddus, čállá lihttu.
Sihtet geassit ohcamuša ruovttoluotta
Luonddugáhttenlihttu buohtastahttá Davvi-prošeavtta Gilivuona bieggamilluiguin gos leat 17 bieggaturbiinna 1,6 km2 sturrosaš guovllus, mii lea dagahan ahte eanaš oassi 1000 bohccos garvet guovllu mii lea 67 km2 viiddis.
– Lágesduoddarii áigot cegget 267 bieggamillo mat leat stuorábut go Gilivuonas, ja dagaha ahte vel viidát guovllut eai sáhte geavahuvvot boazodoalus, čállá Luonddugáhttenlihttu ja gáibida bieggamilloprošeavtta bissehuvvot, ja ávžžuha Grenselandet AS geassit ohcamuša ruovttoluotta. Lihttu ávžžuha maid NVE ja ráđđehusa hilgut bieggamilluid guovlluin mat leat dehálaččat boazodollui.
