Luonddugáhttenlihttu gáibida heaittihit biejuin viežžamis geatkečivggaid go galget váruhit ahte geatkenálli ii laskagoađe. Dát vuohki čađahuvvo lassin dábálaš liseansabivdui.
Luonddugáhttenlihttu gáibida heaittihit biejuin viežžamis geatkečivggaid go galget váruhit ahte geatkenálli ii laskagoađe. Dát vuohki čađahuvvo lassin dábálaš liseansabivdui.
Fuođđoeallit leat ráfáidahtton eallit go leat čivganáigi, muhto eiseválddit leat spiehkastan njuolggadusain go lea geatkkis sáhka. 2001 rájes leat viežžan čivggaid 142 geatkebiejus, dieđiha NRK.
Luonddugáhttenlihttu reagere
– Dát lea barbáralaš vuohki mii dahkko dušše dan dihte vai logu unnida áitojuvvon nális Norggas, dadjá Luonddugáhttenlihttu fágajođiheaddji Arnodd Håpnes NRK:i.
Stáda luonddubearráigeahččit gávdnet bieju, ja vižžet čivggaid olggos biejus ja heakkahuhttet daid.
Biejuid rievideapmi lea lassin dábálaš geatkebivdui vai doalahit nállelogu dan dásis man Stuoradiggi lea mearridan, ahte Norggas ožžot leat 39 geatkečivgajoavkku juohke jagi.
Doahttalit goappašat beliid
Sivva manne fertejit biejuin viežžat geatkečivggaid, lea dan dihte go ákkastallo ahte geatki lea boraspire Norggas mii eanemusat goddá sávzzaid.
– Lea vuohki mii lea ávkin go šaddat reguleret geatkenáli, ja man bokte mii nagodit dahkat dan. Mii fertet doahttalit sihke geatkki boraspiren, ja nuppi beales doahttalit ealáhusa, dadjá Dálkkádat- ja birasdepartemeantta stádačálli Atle Hamar NRK:i.
(©NTB)
