-Almmuhus-
OĐĐASATGáibidit guhkit doalahit servvodatnjunnoša giddagasas

Gáibidit guhkit doalahit servvodatnjunnoša giddagasas

-

-

Politiijat viiddidit áššáiduhttima ja gáibidit guhkidit Romssa servvodatnjunnoša giddagasáiggi njeljiin vahkkuin.

Háldogiddagasáigi áššáiduhtton dievddus luohpá duorastaga diibmu 16.00. Dievddu bealušteaddji oaččui duorastaga iđit dieđu ahte politiijat áigot gáibidit háldogiddagasa guhkidit.

 

– Lean ožžon njálmmálaš dieđu ahte politiijat gáibidit guhkiduvvot giddagasáiggi, muhto ii leat boahtán vel midjiide gáibádus, muitala advokáhtta Ulf E. Hansen NTBi.

Giddagasčoahkkin álgá duorastaga diibmu 14:s, ja bealušteaddji dieđiha ahte sii áigot hilgut guhkidit áiggi.

 

Ohcame eanet duođaštusaid

Ovddit duorastaga vižže dievddu giddagassii, ja politiijat sihte Davvi-Romssa diggegotti bidjat dievddu giddagassii guovtti vahkkui, muhto diggi oaivvildii ahte okta vahkku lea doallevaš vuosttaš vuoru.

Politiijat eai leat nu ollu kommenteren áššis, muhto gaskavahku muitaledje ahte sii leat iskame duoguštemiid áššis, ja gehččet gávdnet go ođđa duođaštusaid dievddu vuostá. Duogušteamit leat nu go govat, filmmat ja hupmanloggat.

Duorastaga diibmu 18.00 dollet politiijat preassačoahkkima gos muitalit dili áššis ja makkár ágga lea ain doalahit dievddu giddagasas.

 

Ovdalaš dáhpáhusat

Dáhpáhusat áššáiduhttimis galget geavvan sihke ovdal ja maŋŋel go ođđa ráŋggáštusláhka biddjui doibmii golggotmánu 1.beaivvi 2015:s. Son lea maid váidon sullasaš dáhpáhusa ovddas 2016:s, muhto politiijat heaittihedje ášši go lei váttis duođaštit ahte dievdu lei iežas servvodatsaji ávkkástallan vai oliha seksualálaš bálvalusa.

– Mii eat cealkke áššis lea go áššáiduhtton dievddus ovdal leamaš gulahallan politiijaiguin, vástidii politiijastašuvdnahoavda Anita Hermandsen NTB:i gaskavahkku.

(©NTB)

-Almmuhus-