Deanu ovdagoddi lea čoahkkimis mannan vahkku mearridan sáddet gáibádusa Statnettii hukset 420kv el-fápmolinjjá Vuonnabađa rádjái Nuorta-Finnmárkui.
Deanu ovdagoddi lea čoahkkimis mannan vahkku mearridan sáddet gáibádusa Statnettii hukset 420kv el-fápmolinjjá Vuonnabađa rádjái Nuorta-Finnmárkui.
Buot suohkanat Nuorta-Finnmárkkus dorjot gáibádusa Nuorta-Finnmárkku guovlluráđi bokte. Fylkkamánni lea máŋgii cuiggodan el-fápmosihkarvuođa mii ii leat doarvái buorre. Ii leat čoavddus bissehit 420kv el-fápmolinjjá Áltái, nu go aiddo lea dieđihuvvon, čállá Deanu ovdagoddi preassadieđáhusas.
– Mii vásihit ahte el-fápmu Finnmárkkus lea rašši ja mii leat vuorjašuvvan ja ballat jus stuora ja duođalaš dáhpáhus geavvá jus el-fápmu boatkana heahtedilis, čuožžu preassadieđáhusas.
Ii leat dilli áiggi golahit
Stuora industriijaprošeavttaid eai sáhte álggahit Finnmárkkus go váilu dákkár infrastruktuvra. Ovdagoddi čállet ahte sii dihtet dakkár prošekteren- ja huksenbargu ádjána máŋggaid jagiid ii ge leat dilli áiggi golahit plánejuvvon prošeavttaide Mátta-Várjjaga gielddas. Ii leat vejolaš ávkkástallat bieggafápmokonsešuvnnain mii lea juolluduvvon Nuorta-Finnmárkui jus ii leat dákkár kapasitehtalasiheapmi, čuožžu viidáset preassadieđáhusas.
Kapasitehta ferte leat sajis
Barentsmearas rádjelinjjá bokte leat ohcagoahtán eanet oljju ja gássa. Lea stuora vejolašvuohta ahte doppe gávdno rogganveara gávnnus. Mii vuordit ahte ásahit industriija Nuorta-Finnmárkui dan vuođul. Dalle ferte leat buorre kapasitehta fievrredanneahtas jus galgá geavahit el-fámu go ásahit ođđa ásahusaid. Dál ii leat sadji neahtas ásahit ealáhusovdáneami gáttis mii dárbbaša ollu el-fámu. Dát lea hui šállošahtti, dieđiha Deanu ovdagoddi preassadieđáhusas.
