Suttesádjagis, olggobealde Gáregasnjárgga, galggai šaddat čáhceboahtalastinprošeakta, muhto lea heaittihuvvon. Dál háliidit vuosttaldeaddjit ahte galget čorget čáhceváldingáivvuid ja bohcciid.
– Suttesádjaga guovllu oktavuhtii leat ohcan Meahciráđđehusas eananláigohanlobi čáhceboahtalastinfitnodaga várás juo golbmii, muhto guovllu álbmot lea nagodan caggat figgamušaid. Mii, vuolláičállit, háliidat sihkkarastit ahte Suttesádjaga eai ávkkástala ruđalaččat boahttevuođasge, muitala Sofe Mákká Lahja Meeri, dahje Meeri Välimaa.
Reivve, man Välimaa lea sádden meahcástanráđđehussii, leat 48 olbmo vuolláičállán.
– Mii atnit juohke vuolláičállaga alla árvvus ja lea dehálaš čalmmustahttit ahte sihke báikkálaš olbmuin, ja sis geain leat čanastagat guvlui, lea beroštupmi suodjalit sápmelaččaid árbevieruid ja ráfáidahttit min bassi báikkiid, dadjá Välimaa.
Eai hálit bassi báikki bilidit
– Suttesája ja dan biras lea guovllu olbmuide, stáhta rájáin beroškeahttá, bassi báiki. Ii leat heivvolaš ahte sápmelaččaid bassi báiki lea nuoskkiduvvon, dadjá Välimaa.
Son muitala ahte guvlui guoská kulturmuitoláhka ja doppe gávdno maiddái erenomáš luondduvalljivuohta. Čáhcerusttegiid eretčorgen čájehivččii dan, ahte sápmelaččaid árvvut ja dáhttu gudnejahttojuvvojit ja ahte Meahciráđđehusas eai leat áigumušat boahttevuođasge láigohit guovllu fitnodagaide.
– Suttesádjaga bálddas vuolgá Geavu luonddubálggis, mii lea leamašan hui bivnnut turisttaid gaskkas, eandalii mannan geasi go koronapandemiija lea lasihan turismma davviguovlluin. Bálgá álggus gávdno párkerenbáiki ja doppe leat olgohivssegat. Dan dihte guovllus johtet olu turisttat ja leat maiddái nuoskkidan birrasa, dadjá Välimaa.
– Suodjalit ja ráfáidahttit iežaset bassi guovlluid
Son muitala ahte vuolláičállit maid gáibidit dan ahte Meahciráđđehus sirdá párkerenbáikki ja olgohivssegiid ovdamearkka dihtii Luopmošjávrriid geainnu gurrii. Luonddubálggis doalvu bassi gáldui, ja sii eai hálit ahte sápmelaččaid bassi báikkiid geavahit turisttaid geasuheapmái.
– Eamiálbmogat birra máilmmi leat álgán eanet ain eanet suodjalit ja ráfáidahttit iežaset bassi guovlluid. Ovdamearkka dihtii Austrália eamiálbmogat leat ráfáidahttán bassi Uluru ja Anára Áijihsullos lea Meahciráđđehus burgán ráhpáid dál, golggotmánus. Vuordit, ahte Meahciráđđehus joatká dán buori gulahallama sápmelaččaiguin. Iežamet bassi báikkiid ja kulturárbbi suodjaleapmi lea buot álbmogiid, maiddái eamiálbmogiid, iešmearridanvuoigatvuohta, dadjá Välimaa.
Meeri Välimaa muitala Ávvirii ahte Meahciráđđehus lea váldán oktavuođa ja leat álggahan ságastallama. Ávvir ii leat ožžon oktavuođa Meahceráđđehusain.
