-Almmuhus-
-Almmuhus-
OĐĐASATGáibi­dit bisso­vaš covid-19 heli­koptera davás

Gáibi­dit bisso­vaš covid-19 heli­koptera davás

-

-

– Ulbmil láigohit helikoptera lea doalahit medisiinnalaš gearggusvuođa dábálaš biila- ja áibmoámbulánsabálvalusas. 

Dán čilge Romssa ja Finnmárkku fylkkadikki Guovddášbellodat cealkámušas covid-19 gearggusvuođa birra davvin. Guovddášbellodat, Bargiidbellodat, Sosialisttalaš Gurutbellodat, Kristtalaš álbmotbellodat, Nordkalottfolket ja Miljøpartiet de Grønne leat ovttaráđálaččat dan mearridan.

Cealkámušas čállá fylkkadiggi ahte berre viiddidit Áibmojohtolaga soahpamuša láigohit helikoptera covid-19 gearggusvuohtan, dieđihit preassadieđáhusas. 

– Ulbmil láigohit helikoptera lea doalahit medisiinnalaš gearggusvuođa dábálaš biila- ja áibmoámbulánsabálvalusas, ja de sáhtášii fievrredit buhcciid geain navdet dahje lea duođaštuvvon lea covid-19 sierra njoammuisoláhtas/njoammungeahtuin, lohká Guovddášbellodaga joavkojođiheaddji fylkkadikkis, Irene Lange Nordahl. 

Helikopterbálvalus dehálaš

Gurotbellodaga fylkkadikkeáirras Kurt Wikan muittuha ahte covid-19 ii leat nohkan ja leat ain viiddis koronagáržžideamit miehtá Norgga. Lohká ahte farga dálvá ja galggašii maid davvin sáhttit fállat seamma dearvvašvuođabálvalusa go muđui riikkas.

Irene Lange Nordahl lohká helikopterfálaldaga nannet hirbmat buohcci olbmuid fievrredanvejolašvuođaid. Lohká jus ii leat bissovaš helikopterfálaldat, de lea bahá ahte ii sáhte sáddet hirbmat buohcci olbmuid buohccevissui. Lohká Guovddášbellodat lea ilus go ráđđehus lea luoikan bealji dán áššái ja bidjet bissovaš helikoptera Kirkonjárgga buohccevissui, mii lei ulbmil go buohcceviesu huksejedje. 

Seamma dikšu miehtá riikka

UNN Romssas leat sihke gearggusvuohta ja fágagelbbolašvuohta njommunsuodjalanfágas ja CBRNE, kemihkalaš ávdnasat, biologalaš agensa, radioaktiivvalaš ávdnasat, nukleara ávdnasiin ja bávkkehanađain. Doppe lea gelbbolašvuohta fievrredit olbmuid geain lea njoammudávda ja sáhttá fievrredit hirbmat buohcci olbmuid njoammungeahtuin. Wikan ja Nordahl lohkaba ahte Guovddášbellodahkii lea dehálaš ahte buohkat ožžot dan seamma bálvalusa miehtá Norgga. Olbmot galget oažžut dan buoremus divššu beroškeahttá gos ásaš. 

-Almmuhus-