Álttá suohkan ávžžuha maid ahte bargit sihkkot dáid applikašuvnnaid priváhtatelefovnnain.
Álttá suohkan čuovvola Nationála sihkarvuođaeiseváldi (Nasjonal Sikkerhetsmyndighet, NSM) ja gáibida dál ahte buot bargit váldet eret TikToka ja Telegrama bargotelefovnnain, dihtordulbosiin ja dihtoriin maid Álttá suohkan lea háhkan ja máksán.
– Juohke bargis lea ovddasvástádus sihkkut buot dáid applikašuvnnaid jus dat leat biddjon bargoreaidduide, dieđiha Álttá suohkan preassadieđáhusas.
Álttá suohkan ávžžuha maid ahte bargit váldet eret dáid applikašuvnnaid priváhta telefovnnain jus suohkanlaš e-poasta dahje Teams lea installerejuvvon ja adno priváhtatelefovnnain.
Suohkan ákkastalla eretváldima dainna ahte TikTok ja Telegram leat Ruoššas ja Kiinnas vuolggahuvvon, ja ahte Norgga eiseválddit árvvoštallet dáid riikkaid stuorimus áittaaktevran Norgga sihkarvuođaberoštumiide. NSM lea ávžžuhusaid hábmen Justiisa- ja gearggusvuođadepartemeantta ovddas ja Álttá suohkan čállá ahte lea lunddolaš sidjiide čuovvolit dáid ávžžuhusaid.
