Sámediggeráđđi Silje Karine Muotka oaivvilda ahte ferte vuos čielggas makkár váikkuhusat leat guolástusealáhussii ovdal go huksejuvvojit merrii bieggamillopárkkat Sandskallen-Sállan Davvi guvlui Hámmárfestii.
Sámediggi oaivvilda ahte guolásteddjiiguin ferte gulahallat dan oktavuođas go evttohit mearraenergiija hukset.
– Mun oainnán gulaskuddancealkámušain ahte guoskevaš guolásteaddjit ja guolástusorganisašuvnnat vuostálastet garrasit Sandskallen-Sállan Davvi rahpama bieggafápmobuvttadeapmái. Dan ákkastit dainna go das leat hui stuorra negatiivvalaš váikkuhusat guolástusealáhussii. Dárbu lea deattuhit guolástusealáhusa luondduvuđđosa, mii lea leamaš geađgejuolgin smávva gilážiidda don doloža rájes.
Nu dadjá sámediggeráđđi Silje Karine Muotka Sámedikki preassadieđáhusas, ja deattuha ahte guolásteaddjit fertejit guldaluvvot dán ášši oktavuođas.
Departemeanta evttohan
Oljo- ja energiijadepartemeanta lea evttohan rahpat guokte guovllu mearraenergiijahuksemii, Utsira Davvi ja Sandskallen-Sállan Davvi.
Sámedikki mielas sáhttet guoskevaš guovlluin Sandskallen-Sállan Davvi leat váikkuhusat sámi kultuvrra ja ealáhusbarggu luondduvuđđosii.
Máhttu «Strategisk konsekvensutredninger for havvind» nammasaš 2013 čielggadusas, ja dan gulaskuddamis boahtán gulaskuddancealkámušain oaidnit čielga gova ahte Sandskallen-Sállan Davvi lea guolásteddjiide deaŧalaš ja lagaš bivdoguovlu, ja fágaossodagat, Guolástusdepartemeanta ja Guolástusdirektoráhtta ja guoskevaš guolástusorganisašuvnnat leat maiddái rávven ahte eai raba Sandskallen-Sállan Davvi mearraenergiijahuksemii.
Čielggadit
– Jos Oljo- ja energiijadepartemeanta háliida vuostálastit fágaeiseválddiid rávvagiid, de berre vejolaš váikkuhusaid guolástussii čielggadit eanet ovdal go vejolaš mearrádus dahkkojuvvo. Dakkár čielggadus berre sisdoallat bivdobáikki vahátárvvoštallamiid ja maid dat mearkkaša guolásteddjiide geat leat sorjavaččat resurssas, ja váikkuhusaid mat čatnasit bargosajiide vuostáiváldinrusttegis nannámis, dadjá Muotka.
Sámediggi lea bivdán konsultašuvnnaid Oljo- ja energiijadepartemeanttain ášši birra maŋŋá go gulaskuddan lea loahpahuvvon ja ovdal go departemeanta loahpalaččat mearrida áššis.
