Sámi siida gáibida ahte Norgga ja Suoma eiseválddit váldet vuhtii Deanuleagi ássiid erenoamáš dili go bidjet johtui eastadandoaimmaid, nu ahte doaimmat eai hehtte ássiid vejolašvuođa johtit riikkarájá rastá.
Norgga eiseválddit gáibidit dál ahte olbmot geat bohtet Lappi leanas galget erremii go bohtet Norgii. Lappi leanas leat maŋimuš 14 beaivvi leamaš 44 njoammuma. Eanas njoammumat leat Roavvenjárggas, sullii 450 kilomehtera eret Ohcejogas, ja Durdnosis, vel guhkkelis.
Rádjehehttehusat gusket maiddái Ohcejohkii, vaikke Ohcejogas ii leat oktage njoammun.
Suoma eiseválddit ges gáibidit ahte Norggas boahtán olbmot galget erremii go bohtet Supmii, muhto dat gáibádusat eai guoskka goittotge rádjeguovllu ássiide, eaige hehtte Deanuleagi olbmuid johtima rájá rastá.
– Deanuleahki lea kulturguovlu gos lea oktasaš sámegiella, gos bearrašat ja fuolkkit ásset goappašiid beliid rája, ja servodat- ja ealáhuseallinge gillá sakka go rádjá lea giddejuvvon. Mii gáibidit ahte rádjá rahppo ja bissu rabas olbmuide geat ellet Deanuleagis go eai leat buorit ákkat doallat rájá gitta. Searvi hástá maiddái sámedikkiid bargat ášši ovdii, čállá Sámi siida preassadieđáhusas.
