Mikkel Mathis Eira lohká rievssatbivdiid ja beatnagiid stuorra giksin, go eallu ii bálle ráfis guohtut. – Gáibidan rievssatbivddu bissehuvvot, lohká son.
Mikkel Mathis Eira lohká rievssatbivdiid ja beatnagiid stuorra giksin, go eallu ii bálle ráfis guohtut. – Gáibidan rievssatbivddu bissehuvvot, lohká son.
Ábborášša orohaga boazoeaiggádis Mikkel Mathis Eiras lea čakčaorohat Biedjovákkis Guovdageainnu suohkanis. Son lea maŋemuš vahkuid vuohttán ja oaidnán ollu rievssatbivdiid, ja lohká bivdiid stuorra giksin orohahkii:
– Čuđiid mielde bohtet ja measta buohkain beana, ja dat čuohcá dieđusge garrasit bohccuide, lohká Eira.
Son čilge ahte dál lea áigodat goas boazu galggašii ráfis bállet guohtut ja ráhkkanit dálvái.
Beatnagat oaguhit ealu
Mikkel Mathis Eira vásiha jahkásaččat Biedjovákkis rievssatbivdiid, muhto ii loga goassege vásihan nu ollu bivdiid go dán čavčča, iige Eira loga bivdiid vuhtii váldit boazoealáhusa.
– Šattan guođuhit ealu ijatbeaivvi, bivdit vázzet ealu čađa ja beatnagat oaguhit bohccuid, dadjá erdon Eira.
Gáibida bissehit
Mikkel Mathis Eira oaivvilda Finnmárkkuopmodat (FeFo) berre bissehit smávvafuođđobivddu, erenomážit guovlluin gos ealut leat ollen čakčaorohahkii.
– FeFo lea almmuhan ahte leat ollu rievssahat, ja nu bohtet čuđiid mielde deike bivdit. Eai oba leat ge gulahallan boazoealáhusain, juoga mii lea oalle váidalahtti, cuiggoda son.
Ávžžuhit garvit guovlluid gos leat bohccot
Finnmárkkuopmodaga meahccehálddašanossodaga hoavda Einar Johannes Asbjørnsen muitala sis lea čielga ávžžuhus smávvafuođđobivdiide garvit guovlluid gos leat bohccot. Asbjørnsen ii loga oahpisin ahte Biedjovákkis leat hástalusat ja ávžžuha boazoeaiggáda váldit oktavuođa FeFoin.
Mikkel Mathis Eira moaitá maid Guovdageainnu suohkana go addet sierravuodjinlobiid guovlluide gos olbmuin leat ealut.
Loga olles ášši gaskavahkku báberaviissas, iPad-aviissas dahje pdf-avissas.
