Oahppolihtu sámelávdegotti jođiheaddji ohcala Ráđđehusas dáhtu doarjut Aarborte sámeskuvlla
Oahppolihtu sámelávdegotti jođiheaddji ohcala Ráđđehusas dáhtu doarjut Aarborte sámeskuvlla
Oahppolihtu Gro Hartveit čálii Máilmmi álgoálbmotbeaivvi oktavuođas, mii lei borgemánu 9. beaivvi, ahte ohcala Ráđđehusas stuorit dáhtu doarjut sápmelaččaid. Dán oktavuođas čujuha son Aarborte sámeskuvlla áššái.
2017 rájes fas áitta
Ráđđehus áiggui dán jagi gieskat heaittihit Aarborte Sámeskuvlla, muhto dan áigumuša cagge earret eará Oahppolihttu ja ráđđehusa guokte ovttasbargobellodaga, Risttalaš álbmotbellodat ja Gurut. Dál lea skuvlla sihkkaraston dušše dán jagi olggos. Maŋŋel dan lea fas hui eahpečielggas mii dáhpáhuvvá skuvllain.
– Sámeskuvla ovddasta dehálaš kultuvrralaš fámu ja lea hui mávssolaš lullisámi álbmogii jus galget sáhttet bisuhit kultuvrraset, gielaset ja iežaset identitehta, dadjá Hartveit.
Vearrás vuoigatvuohtadilli
Son čilge ahte ráđđehusas leat dieđihan ahte lullisámi skuvlafálaldat galgá ođđasit organiserejuvvot. Son ávžžuha ráđđehusa garrasit bisuhit sámi ohppiid fálaldaga. Hartveit lohká muđui ahte sápmelaččain lea vuoigatvuohta oahpahussii sámegillii, muhto duohta dilis leat dat vuoigatvuođat garra deattu vuolde ja digaštallet mat dat vuoigatvuođat duođas leat. Son cuiggoda maid váilevašvuođaid ođđa oahppoplánaid bargguin.
– Sámi oahppoplánat fertejit leat gárvásat oktanis dárogiel oahppoplánaiguin ja dat fertejit heivehuvvot sámi kultuvrii, árbevieruide ja birrasiidda, čállá son neahttasiiddus.
Su mielas ii ge leat dohkálaš go váilot ain oahpponeavvut sámegillii. Dán čavčča galgá ge Stuoradiggi gieđahallat Stuoradiggedieđáhusa mii lea Máhttoloktema ođasteami birra, dárogillii ”Fag – Fordypning – Forståelse. En fornyelse av kunnskapsløftet (Meld. St. 28 (2015-2016)”.
