Porsáŋggu sátnejođiheaddji, Knut Roger Hanssen, dáhtu ođđa politiijaguovllu ásahuvvot guovdu Finnmárkku, nammalassii Levdnjii.
Go Nuorta-Finnmárkku politiijaguovlu ja Oarje-Finnmárkku politiijaguovlu ovttastuvvaba, de oaivvilda Porsáŋggu sátnejođiheaddji, Knut Roger Hanssen, ahte váldokantuvra galgá ásahuvvot su gildii.
– Finnmárkku fylka viidodaga geažil berre politiijaguovllu váldokantuvra ásahuvvot guovdu fylkka, nammalassii Levdnjii, lohká son iFinnmark neahttaaviisii.
Dán árvalii sátnejođiheaddji iežas Facebook siidui go čielggai ahte boahtte áiggis galggašii dušše okta politiijaguovlu Finnmárkkus.
– Mus leat máŋga ákka manin politiija váldobáiki berre leat Porsáŋggus. Mu mielas ánssášat oažžut juoidá ruovttoluotta stádas go lagabui 80 proseanta gieldda areálas lea ráfáiduvvon našunálapárkan dahje geavahuvvo suodjalusdoaimmaide, čilge son.
Unnidit politiijaguovlluid
Sotnabeaivvi čielggai ahte lea áigumuš unnidit Norgga politiijaguovlluid badjel beliin. Ráđđehusbellodagat, Gurutbellodat, Risttalaš Álbmotbellodat ja Bargiidbellodat háliidit ahte buot gielddat ožžot sierra politiijagulahalli go unnidit 27 politiijaguovllu 12 politiijaguovlun. Davvi-Norggas leat dál oktiibuot guhtta politiijaguovllu, Nordlánddas ovttastuvvojit golbma politiijaguovllu, Romsa bissu sierra politiijaguovlun ja Finnmárkkus ovttastahttet guokte politiijaguovllu.
– Stuora politihkalaš ovttaoaivilvuohta lea buorre, jáhkkán unnit politiijaguovlluid ovdamunnin ovddidit boahtte áiggi politiija Norggas, logai Politiijadirektevra Odd Reidar Humlegård preassakonferánsas ikte.
Ii imaš Hanssen gáibádusa
Nuorta-Finnmárkku politiijaguovllu váldobáiki lea dál Girkonjárga ja Oarje-Finnmárkku ges Hámmárfeasta. Stuorradiggeáirasa Jan Henrik Fredriksen dieđuid mielde ii leat vel mearriduvvon gos váldobáiki šaddá boahttevaš Finnmárkku politiijaguovllus.
Politiijafágalaš árvvoštallan mearrida gosa dat ásahuvvo. Ádden Porsáŋggu sátnejođiheaddji gáibádusa bures, muhto dákkár gáibádus dáidá maiddái boahtit sihke Álttás, Hámmárfeasttas, Girkonjárggas ja Čáhcesullos. Lea badjelmielat jorahit dán politihkalaš áššái, mii fertet politiijaid gelbbolašvuhtii addit dán mearridanválddi, dadjá Fredriksen iFinnmarki.
Finnmárkkus illudit
iFinnmark dieđuid mielde leaba goappašat politiijameaštárat Finnmárkkus háliidan ahte ovttastahttet politiijaguovlluid Norgga davimus fylkkas. Nuorta-Finnmárkku politiijameašttir Ellen Katrine Hætta mielas šaddá gelddolaš oaidnit makkár premissaid bidjet go gieđahallet ášši Stuoradikkis. Son ii leat vel mearridan áigu go ohcat politiijameašttirin ođđa politiijaguovllus. Stuoradiggi gieđahallá ođđa politiijareforbma geassemánu 10. beaivvi.
