Davvi-Norggas njiedjá olmmošlohku dán jagi. Nordlándda fylka vásiha stuorámus olmmošlohkonjiedjama dán jagi.
Dušše suoidnemánus, borgemánus ja čakčamánus njiejai olmmošlohku 702 olbmuin, čájehit Statistihkalaš guovddášdoaimmahaga (SSB) ođđa logut.
Maŋŋebárgga ovddidii Guovddášbellodaga jođiheaddji Trygve Slagsvold Vedum gažaldaga stáhtaministarii Erna Solbergii, ja jearrá lea go Solbergas oskkáldasvuohta dan stuorra olmmošlogu njiedjamii mii dál dáhpáhuvvá Davvi- Norggas.
Trygve Slagsvold Vedum hástala Olgešbellodaga ja Ovddádusbellodaga bidjat doaimmaid mat sáhttet jorgalahttit dán.
– Dat mii dál dáhpáhuvvá Davvi-Norggas lea hui dramáhtalaš. Ovdamearkka dihte Nordlánddas. Nu guhká go SSB lea čađahan kvartála olmmošlogu statistihkka, de ii leat goassege leamaš nu stuorra olmmošlohkonjiedjan ovtta kvartálas, dadjá Trygve Slagsvold Vedum preassadieđáhusastis.
