Davvi-Sáččá orohat Romssas čuoččuha skohtervuodjimiid dagahan ahte orohat lea massán 432 bohcco main árvu lei 1,3 miljovnna ruvnno.
Davvi-Sáččá orohat Romssas čuoččuha skohtervuodjimiid dagahan ahte orohat lea massán 432 bohcco main árvu lei 1,3 miljovnna ruvnno.
Boazodoallit háliidit ahte skohtervuodjimiid čavgejit.
– Lea 432 eallis sáhka. Ná ollu elliid massit joavdelas vuodjimiid dihte ii heive oktii boazodoaluin, čállá Davvi-Sáččá orohaga jođiheaddji Per Mathis Skum reivvestis Leaŋgáviika suohkanii, čállá Nordlys aviisa.
Skum čilge ahte skohtervuodjimat, sihke dat maidda lea addon lohpi ja lobihis vuodjimat, baldet eret bohccuid guohtuneatnamiin ja bohccot de mannet ceakkus várregilggaide.
Addá vejolašvuođa
Suohkan lea ovdal hilgon buhtadusgáibádusa, ja Skum muitala áigut váidit ášši.
– Mun áiggun vuordit vehá ja attán suohkanii vejolašvuođa gulahallat minguin álggos, muitala Per Mathis Skum.
Meannudit ášši
Leaŋgáviika suohkana ráđđeaddi Svein Georg Hove lohká masson bohccuid logu leat alladin, ja muitala ahte suohkan áigu biras- ja hálddašanlávdegottis meannudit gáibádusa čakčamánus. (©NTB)
