Toralf Henriksenis ii leat doaivva ahte sámiid 21. konferánsa gáibádus hilgut Deanu soahpamuša, váikkuha maidege. Son lohká sámepolitihkkárat fertejit ieža deaivvadit stuoradiggepolitihkkáriiguin jus áigot maide váikkuhit.
Toralf Henriksenis ii leat doaivva ahte sámiid 21. konferánsa gáibádus hilgut Deanu soahpamuša, váikkuha maidege. Son lohká sámepolitihkkárat fertejit ieža deaivvadit stuoradiggepolitihkkáriiguin jus áigot maide váikkuhit.
Sámiid 21. konferánsa gáibidii ahte Norgga ja Suoma eiseválddit hilgot Deanu soahpamuševttohusa, ja álggahit ođđa ráđđádallamiid. Cealkámuš sáddejuvvo Norgga Stuoradiggái ja Suoma Riikabeaivái.
— Cealkámušas ii leat ávki masa ge, lohká Toralf Henriksen.
– Eat sáhte reivve bokte gáibidit
Toralf Henriksen lea Sámi meahcceresurssa searvvi jođiheaddji. Son lohká čielgasit ahte áidna vuohki movt sámepolitihkkárat sáhttet duođas váikkuhit dán ášši lea jus ieža mannet Stuoradiggái, ja hupmet stuoradiggepolitihkkáriiguin.
— Mun dieđán, gii lean «lobben» Stuoradikkis 2002 rájes, ii leat ávki sáddet báhpára. Ferte oktii njuniid stuoradiggepolitihkkáriiguin, ja čilget manne lea dehálaš ášši. Eat mii sáhte reivve bokte gáibidit, go eat mana stuoradiggái ja buvtte duohta evttohusa movt čoavdit ášši, lohká Henriksen.
Ávžžuha sámepolitihkkáriid mannat Stuoradiggái
Son ávžžuha buot sámepolitihkkáriid, ii dušše sámediggepolitihkkáriid, váldit oktavuođa stuoradiggeáirasiin, ja šiehttat deaivvadit.
— Dat lea čoavddus. Ii leat dárbu bálkestit evttohusa, muhto sáhttá šiehttat rievdademiid. Sáhttet buktit evttohusaid movt rievdadit vai lea dohkálaš. Dás fertejit eambbosat mielde, orru leame nu ahte doivot áššit njulget go medias čilgejit. Lean heađástuvan go okta nubbi čállá ahte lea dohkketmeahttun, das ii leat ávki, lohká Henriksen.
Son lea ieš bargan sámi vuoigatvuođaiguin, ja lohká iežas olu leamaš Stuoradikkis, deaivvadan olu politihkkáriiguin. Hárve lea oaidnán sámepolitihkkáriid Stuoradikkis, ja dan son imaštallá.
— Mii, sámi servodatberošteaddjit fertet čuvgehit stuoradiggepolitihkkáriidda mat leat dehálaš áššit, go eai sii dieđe man birra galget dieđuid háhkat.
Ieš leamaš mielde váikkuheame
Son namuha ovtta ovdamearkka movt son ieš lei mielde váikkuheame.
— Sámediggi ja Birasgáhttendepartemeanta ledje 2012:s heaittiheame Deanu lága. Go dan fuobmáimet, válden seammás oktavuođa stuoradikkis, ja ožžon eará servviid mielde gulahallamiidda. Boađus šattai ahte jorgalahtiimet láhkaášši, oaččuimet ovttajienalaš doarjaga Stuoradikkis, ahte láhka galgá bissut. Dat lei hui dehálaš ášši, ja mii bijaimet olu barggu dasa. Mii eat sáhttán dohkkehit ahte Norgga boarráseamos láhka mii duođas suddje sámi árbevirolaš luonddugeavaheami galggai sihkkojuvvot.
Konferánssa vuohki ovddidit politihka
Sámiráđi presideanta Åsa Larsson Blind vástida ahte gávdnojit olu vuogit movt ovddida politihka, ja ahte gávdnojit olu iešguđetlágan politihkalaš reaiddut.
— Čállit resolušuvnna dahje deklarašuvnna lea okta vuohki movt sámekonferánsa sáhttá ovddidit politihka. Áššit maid mii ovddidit konferánssas leat áššit maiguin Sámiráđđi boahtá boahttevaš njeallje jagi bargat, ja čuovvolit.
Larsson Blind lohká ahte ii leat nu oahpis Deanu šiehtadusáššái, ja danne ii áiggo juste detáljjaid birra lohkat maide.
— Diehttelas in vuosttil. Jáhkán ahte dakkár gulahallamis livčče ávki, ja buorre reaidu, lohká son.
