Gádjunveagat ožžo olbmáguoktá vulos.
Gádjunveagat ožžo olbmáguoktá vulos.
Mánnodaga álggahuvvui gádjunakšuvdna Ráissas. Guokte olbmo leigga Ráisduottarhálddis, ja eaba beassan vulos dálkki dihte.
Sea-King helikopter vieččai sudno vulos, Sørkjosenii Ráisii. Doppe dolvojuvvuiga doavttiriskkadeapmái.
Leigga Suomabeale olbmot, áhčči bártniinis.
Nordlys muitalii vuosttažin ášši birra. Sii dieđihit maid ahte dat guovttos leigga idjadan muohtabiejus, 1300 mehtera allodagas.
– Lea sáddejuvvon ambulánsahelikopter, ja Sea King lea maid jođus. Birtavári Rukses Ruossa lea maid mielde gádjunakšuvnnas, lohká Romssa politiijaguovllu operašuvdnajođiheaddji Kåre Munkvold Nordlys aviisii.
Šattai jorggihit
Ambulánsahelikopter lei jođus báikái, muhto šattai jorggihit 1 nautalaš miilla eret go ii šat oaidnán girdit. Guovllus lea ge dálki, ja danne maid eaba beassan ieža vulos.
Dasto sáddejuvvui Sea King helikopter Banakis.
– Jus eai beasa helikopteriin dán guvlui, de doalvut Birtavári Ruskes Ruossa nu lahka sudno go sáhttit, čálle Romssa politiijaguovlu Twitterii.
Dál leat ožžon olbmáguoktá vulos.
