Guokte čuoigi eaba beasa eret guovllus dálkki geažil.
Finnmárkku politiijat leat ožžon dieđu ahte guokte olbmo ja okta beana dárbbašit gádjunveahki lulágeahčen Iešjávrri. Politiijat dieđihit Twitteris ahte eai olbmot iige beana galgga leahkit roasmmohuvvan, muhto garra dálkki dihte eai beasa eret báikkis.
Davvi-Norgga Operašuvdnaguovddáš dieđiha ifinnmark.no:i ahte lea sáhka guovtti čuoigis oktan beatnagiin geat leigga vuolgan čuoigat Mollešjoga ja Joatka duottarstobuid gaskkas.
– Dá leaba olbmot geat leaba hárjánan olgun ja meahcis leahkit. Sudnos leat buorit biktasat alde ja valjit biebmu mielde. Sudnos leat maid albma heahtedávvirat ja mii leat gulahallan sudnuin satelihttareaidduid bokte, dadjá operašuvdnajođiheaddji Lars Nedrevåg.
Dálki dagaha ahte gádjunhelikopter SAR Queen ii sáhte loktanit Leavnnjas, ja danne sáddejuvvo Boazopolitiija viežžat čuigiid ja beatnaga.
