-Almmuhus-
-Almmuhus-
-Almmuhus-
Featured box1Gádjon lápmahuvvan skuolffi

Gádjon lápmahuvvan skuolffi

-

-

Sotnabeaivvi gulai Michelle Hætta Nilut rieja viesu olggobeale, ja bivddii bártnášguoktá Peder Issáha ja Kjartan Áillu veahkkin.

– Ledjen viesus geahččame TV, go gullen issoras rieja veránddas. Viehkalin olggos geahččat, de oidnen máŋganuppelot garjjá mat doaruhedje skuolffi, muitala Michelle Hætta Nilut. 

Hætta Nilut muitala ahte illá nagodii baldit garjjáid eret, muhto loahpas girdiledje eret ja de oinnii ahte skuolfi lea lápmahuvvan. 

Máŋganuppelot garjjá ledje fallehan skuolffi Michelle Hætta Nilut’a verándda alde. Govven: Caroline Kemi
Máŋganuppelot garjjá ledje fallehan skuolffi Michelle Hætta Nilut’a verándda alde. Govven: Caroline Kemi

Bártnášguovttos Peder Issát (10 jagi) ja Kjartan Áilu (6 jagi) leigga olgun stoahkame go Michelle čuorvugođii sudno. 

Peder Issát ja Kjartan Áilu bijaiga lápmahuvvan skuolffi gielkká nala, ja válddiiga dan mielde sudno siesá, Liv Karin Klemetsena lusa. Liv Karin ordnii skuolfái vuogas orohaga viesu geallárii, sávdnjái.

Lápmahuvvan

– Mii eat dieđe lea go nubbe juolgi doddjon. Skuolfi ii riekta nagot čuožžut juolggi nalde, gáhččá ovddosguvlui jus geahččala čuožžut, muitala Liv Karin Klemetsen. 

Klemetsen muitala ahte skuolfi lea hui váibmil ealgabirgui. 

– Mis ii leat vel leamaš šibitdoavttir dáppe, muhto guokte doaktára leaba leamaš. Soai leaba geahččan movt julggiin manná, ja vuhtiimet ahte nubbe juolgi lea bávččagan, muitala Klemetsen.

Áŋgiris divššarat

Klemetsenas leat olu veahkit dikšut skuolffi, nieiddašguovttos Mia Madeleine Eira Evertsen (13 jagi) ja Ida Sofie Klemetsen Gaup (12 jagi) leaba idjadan nuppelanjas vuoi gullába jus skuolffis šaddá heahti. Nieddašguovttos dat biebmaba ja bearráigeahččaba ahte skuolffis lea buorre dillii. 

– Moai oaččuime 2 diimmu friddja skuvllas go oahpaheaddji gulai mii munnos lea ruovttus, ja ahte skuolfi dárbbaša divššu. Moai ráhkadeimme maid ovdanbuktima PowerPoint’as vai beasaime skuvllas čájehit oahpaheaddjái ja luohkkái, muitaleaba Mia Madeleine ja Ida Sofie. 

Nieiddat muitaleaba maid ahte soai leaba bidjan nama skuolfái. 

– «Malakas» lea skuolffi namma, ja dat mearkkaša gievra Filipiinnat gillii, muitaleaba nieiddat. 

Sáhpániid ozus

Skuolfi oidá biepmu mas leat guolggat. Nieiddašguovttos šaddaba čuohppat bohccoduoljis guolggaid, ja bidjat ealgabierggu nala ovdalgo skuolfi borrá. Bierggu bidjaba skuolffi njune vuollai vai borrá. Čázi addiba plasttitsprøytain. 

– Moai letne dal jurddašan caggat sáhpángillariid olggos vai besse skuolfái borahit sáhpána, muhto ean leat sihkkarat borrá go skuolfi dán, muitaleaba nieiddat. 

– Eat sáhte luoitit ovdal go dearvvašnuvva

Liv Karin ja mánát ballet ahte skuolfi jápma jus luitet dan olggos, go ii han nagot čuoččut juolggi alde. Liv Karin muitala ahte lea hupman ovttain oahppásiin geas maid lea leamaš skuolfi iežas luhtte, ja son muitalii ahte sus lei skuolfi olles 3 vahkku su luhtte. 

– Ii skuolfi dárbbaš nu olu divššu, beare oažžu biepmu ja čázi, ja go mii oaidnit ahte skuolfi baiká dat mearkkaša ahte skuolfi borra. Go mii oaidnit ahte skuolfi álgá dearvvašnuvvat, de mii veardidit sáhttit go luoitit dan,  muitala Klemetsen. 

Geahča filmma go Ávvir finai Liv Kari luhtte:


-Almmuhus-