Unjárga ja Deatnu girjebusse doaibmá viidáset maŋŋel go leat bargan gádjut dan olles čavčča.
Unjárgga gielda čállá ahte politihkkárat ja hálddahus leat olles čavčča bargan oažžut ruhtadeami vai doalahit girjebusse Deanus ja Unjárgga álbmogii.
Maŋŋel go masse doarjaga, de eai diehtán movt galget doalahit girjebusse-fálaldaga, muhto goappaš gielddaid politihkkárat ledje ovttaoaivilis ahte sii galget nagodit gádjut dan, ja dál čállá ge Unjárgga gielda ahte sii nagodedje dan.
– Lea hui illudahttii go Finnmárkku fylkasuohkanpolitihkkárat mearridedje joatkit girjebusse doarjagiin. Mii ipmirdit gaskkaid Finnmárkkus, ja diehtit ahte olbmuin lea ávki ja illu buori girjebussefálaldagas, čállá Unjárgga gielda neahttasiiddus.
Girjebusse lei meannuduvvon heaittihuvvot mannan juovlamánu, muhto de ožžo juste ovdal juovllaid šiehtadusa Ohcejoga suohkaniin ahte sii maid ostet fálaldaga Unjárgga/Deanu girjebusses dán jagi. Šiehtadusa galget árvvoštallat jagi mielde, ja oaidnit searvá go Ohcejoga suohkan eaiggádin boahtte jagi rájes.
