Finnmárkku stuorámus festivála lágiduvvo dán vahkkoloahpa Leavnnjas ja vuosttaš festiválaeahket lei ikte.
Finnmárkku stuorámus festivála lágiduvvo dán vahkkoloahpa Leavnnjas ja vuosttaš festiválaeahket lei ikte.
Ikte buollái fas festivála Lavttejohk’ gáttis Leavnnjas. Vaikko lei dušše 8 gráda ja čoaska davvebiegga de dat ii orron hehtten olbmuid boahtimis festiválii. Finnmárkku stuorámus festivála čohkke olbmuid viidát, sihke lagas birrasis ja maiddái dobbelis. Okta dain lei Ámmun Trosten gii lei boahtán Deanus oasálastit festiválas ja konsearttaid guldalit.
Duđavaš jođiheaddji
Gaskijarocka festiválajođiheaddji Jon Arne Pettersen lohká iežas mearehis duđavažžan festivála álgguin.
– Mun lean hui duđavaš go viimmat lea festivála jođus, dadjá Pettersen.
”Living next door to Alice”
Dan jagi lea festivála ožžon vuot buori artisttaid geat galget guoimmuhit movttegis guldaleddjiid čuvges geasseijaid.
Beakkán Stuorra Britania joavku Smokie lei okta váldoartisttain ievttá eahkeda. Sii geasuhedje veaháš boarráset guldaleddjiid lavddi lusa. Olbmot lávlo oktiijitniid go joavku čuojahii ”Have you ever see the rain”. Joavku loahpahiige konseartta iežaset stuorra klassihkkáriin ”Living next door to Alice”. Orui ahte geahččit ledje duođas vuordán gullat joavkku beakkán klassihkkára mii bođii maŋimužžan.
Stage Dolls
Maiddái Norgga 80-logu rockejoavku Stage Dolls lei lávddi alde duorastaga. Sii guoimmuhedje ja dánssuhedje festivála gussiid ja bidje sin bađaid šlivgut.
– Shake your ass, huike sii lávddi alde.
Muđui rockii Leavnnja nieida Tara Nicolaisen, ja Norgga feastacountryjoavku Vassendgutane duorastat eahkeda. Bergen nieida Gabrielle čohkkiiges nuorra olbmuid lávddi lusa. Galbma davvebiegga ii orron Gabrielle baldimin mii bosui njuolga lávddi vuostá. Son šlivgii dušše jahkas eret seammás go muitala man čáppat ja somá lea davvin čuojahit gos ii sevnnjot.
– Eat leat čuojahan goassige konseartta ná maŋŋit, muitalii Gabrielle
Odne čuojahit
Odne álggaha Luxus Leverpostei konseartta, ja de joatká Hekla Stålstrenga, Genesis Classic ja Tindrum. Kárášjoga joavku Felgen orkester ges loahpaha bearjadat eahkeda Lavttójoh´gáttis.
Čállán: Ristin Ravna Eira
