– Olusat leat Covid-19-pandemiija geažil šaddan bargguhisvuhtii ja bággolupmui. Dál ožžot fylkkat 906 miljovnna kruvnna vai oahppit ja fágaoahpahallit čađahivčče oahpu ja vai sis geat leat bággoluomus lassánivččii gelbbolašvuođa, lohká Máhttodepartemeantta stáhtačálli Grunde Kreken Almeland.
– Nu olusat go vejolaš fertejit čađahit iežaset oahpu vai sis lea buoret birgenmunni boahtteáiggis. Mii vuoruhat erenoamážit fágaoahpahalliid go lagabui 1.500 oahpahalli ain leat bággoluomus. Sis lea gelbbolašvuohta maid mii fertet áimmahuššat ja maid mii dárbbašat boahtteáiggis, lohká Grunde Kreken Almeland preassadieđáhusas.
Lasihit fágareivviid
Dát ruđat leat oassi daid 1,6 miljárdda kruvnnain maid ráđđehus lea vuoruhan skuvllaide, ohppui ja dutkamii Máhttodepartemeantta bušeahtas korona-dili oktavuođas. Fágaskuvllaid oahpposajit ožžot 55 miljovnna kruvnna ja 46 miljovnna kruvnna juolluduvvo vai eanet olbmot sáhttet fágareivve váldit barggus. Ráđđehus lea rievdadan beaiveruhtanjuolggadusaid nu ahte sii geat leat bággoluomus ja bargguhisvuođas sáhttet oažžut daid ruđaid vaikko vázzet kurssa dahje skuvlla.
Romsii ja Finnmárkui doarjja
Romssa ja Finnmárku fylka oažžu 8,7 miljovnna kruvnna dábálaš oahpahallidoarjaga, 15 miljovnna kruvnna vai sáhttá fállat doaimmaid olbmuide bággoluomus ja bargguhisvuođas, 2,4 miljovnna kruvnna vai olbmot sáhttet váldit fágareivve barggus, 3,2 miljovnna kruvnna doarjaga fágaskuvllaide ja 0,9 miljovnna kruvnna fylkkagielddalaš čuovvolanbálvalus nuoraide geat eai leat skuvllas dahje barggus.
