Son álgá virgái suoidnemánu 4. beaivvi.
Gieskat lei johtolaga ovddeš divišuvdnadirektevra, Per Bjørn Holm-Varsi, dieđihan fylkkadirektevrii ahte son heaitá virggis. Suoidnemánu 4. beaivvi rájes lea Bjørg Anita Hansen Joki konstituerejuvvon johtolaga divišuvdnadirektevran.
Gii lea Bjørg Anita Hansen Joki?
Joki lea gazzan juristaoahpu Oslo universitehtas, ja álggii Stáhta luoddadoaimmahaga juridihkalaš ráđđeaddin 1998:s. Sus leamaš iešguđet jođihanvirggit Stáhta luoddadoaimmahagas 2003:s gitta 2020:i. 2020 rájes lea son jođihan Finnmárkku luoddaossodaga. Joki lea 62 jagi boaris ja riegádan Unjárggas.
Dál ássá Čáhcesullos. Sus leat golbma máná ja vihtta mánáidmáná.
Ođđa fylkkaráđđi
Mannan vahkku dieđihii maiddái johtolaga fylkkaráđđi, Agnete Masternes Hanssen (Bb), fylkkadikki čoahkkimis ahte son heaitá.
Johtolaga ođđa politihkalaš jođiheaddji maiddái galgá fylkkaráđđejođiheaddji virgádit jođáneamos lági mielde.
