Finnmárkku fylkkasátnejođiheaddji Hans-Jacob Bønå háliida buoret girdefálaldaga Finnmárkui. Son ávžžuha SAS ordnet fálaldagaid FOT-ruvttuide.
– Mun oaivvildan ahte lasihuvvon gilvu oanehismátkefierpmádagas lea buorre go dat addá eanet girdimátkkiid ja buoret fálaldaga mátkkošteddjiide, lohká fylkkasátnejođiheaddji preassadieđáhusas.
Son doalai aiddo čoahkkima SAS-jođiheddjiiguin digaštallan dihte girdifálaldaga.
– Okta mu deaŧaleamos bargguin ovddos guvlui lea bargat dan ovdii ahte Norggas – ja erenoamážit Finnmárkkus – šaddet buorit dilit girdijohtolahkii. Girdidoaimma haga ii šatta vejolaš ovddidit Finnmárkku ja Davvi-Norgga. Dan ferte ráđđehus váldit duođas, lohká Bønå.
Eai searvan dán vuoru
SAS gávpejođiheaddji Thomas Reinsborg dadjá ahte leat mearridan ahte eai searvva dán háve fálaldatgilvvui FOT-ruvttuid oktavuođas.
– Davvi-Norga ja Finnmárku lea hirbmat geassuheaddji guovlu midjjide. Mii geahččat ovddos guvlui nannet min fálaldaga dáppe, logai Reinsborg.
FOT-ruvttut leat girdemátkkit maid ráđđehus subsidere sihkkarastin dihte girdifálaldaga doppe gos muđui dat illá livčče gánnáhahtti ruđalaččat doalahit girdefálaldaga.
