Dán čavčča galget vuot ealut logahuvvot Finnmárkkus. Dál lea Fylkkamánni ja Eanandoallodirektoráhtta ráhkkaneame guđet siiddat galget lohkkot.
Dán čavčča galget vuot ealut logahuvvot Finnmárkkus. Dál lea Fylkkamánni ja Eanandoallodirektoráhtta ráhkkaneame guđet siiddat galget lohkkot.
– Mii leat dál pláneme guđet siiddat galget lohkat. Eanandoallodirektoráhtta lea gal mii mearrida gos ja goas galget lohkot, go sin bealis ruhtaduvvojit boazologaheamit.
– Mii galgat dušše ávžžuhit guđiid ealuid galggašii lohkat, muitala Finnmárkku Fylkkamánni boazodoalloossodaga direktevra, Trond Aarseth.
Vuoruhit ealuid
Aarseth muitala sii leat bargame geahččalit vásedin ealuid lohkat, nu eai galgga dárbbahit olles johtolaga logahit.
Son lohká sii leat dan guvlui pláneme, muhto ii leat sihkar lea go vejolaš.
– Olihivččiimet eambbo siiddaid lohkat jus eat dárbbat olles johtolaga bohccuid lohkat, lohká Aarseth
Ášši joatká gova vuolde:
– Mis lea plána lohkat siiddaid gos ballat ahte eai leat olihan dan logu maid galggašedje, dahje gos mii ballat leat lasihan logu, dahje juo guđet eai leat lohkan maŋemus jagiid, muitala son.
Oahppán diimmážis
Aarseth muitala sii leat oahppan diimmá lohkamis, ja lohpida dál buorebut ráhkkanahttán lohkkiid ja maid hálddahusbargiid.
– Mii áigut plánet buorebut movt galgat dahkat jus mat muhtun ii logat. Mii veahá mettiimet dainna diibmá, muhto dán čavčča galgá visot sajis min bealis, lohká son.
– Mii áigut maid lohkkiidoahpaheami lágidit boahtte čavčča. Mis leat olu ođđa lohkkit guđet eai leat oahpu ožžon, eambbo bargonjuolggadusaid geahččan. Sii galget áibbas sihkkarit diehtit mii sin bargu lea, ja movt galget dan doaimmahit, lohká Aarseth.
Logaheamit skábman
Aarseth muitala sii leat gergosat sáddet gaskkamuttus borgemánu dieđu siiddaide guđiid galgat logahit dán skábma.
Fylkkamánni ossodagas dieđihit maid ahte vaikke siiddat leat evttohan logahemiid dálvet ja giđabeallái, go leat guhkit čuovga, muhto dasa ii mieđa fylkkamánni boazodoalloossodat.
Logaheamit čađahuvvojit ain skábman.