Finnmárkku fylkkamánni lea gaskaboddosaččat bidjan gildosa vuodjit mohtorfievrruiguin máđijain 4, 5, 6a, 6b, 6d ja 8, ja buot vuodjinlobit dain guovlluin eai leat šat doaimmas.
Finnmárkku fylkkamánni lea gaskaboddosaččat bidjan gildosa vuodjit mohtorfievrruiguin máđijain 4, 5, 6a, 6b, 6d ja 8, ja buot vuodjinlobit dain guovlluin eai leat šat doaimmas.
Lea orohat 9 mii lea váldán oktavuođa fylkkamánniin, ja ávžžuhan gaskaboddosaččat giddet skutermáđijaid. Orohaga ovdaolmmoš, Nils Arvid Guttorm, čállá fylkkamánnái:
– Dálá stáhtus lea nu ahte olles orohat 9:s lea dálveguohtuneatnama bodni jikŋon. Go ledje bivvalis dálkkit skábman, de lei stuora oassi ránnjáorohagas dálveguohtuneatnamiin mat gullet orohahkii D9. Guohtun lea fieskin ja buot dulbmojuvvon, mii lea dagahan ahte eana lea jikŋon. Bivvalat ja arvvit juovllaid ovdal lássii guohtuma go lei fieskin go ránnjáorohat lei guođohan dan guovllus.
Orohaga ovdaolmmoš muitala ahte sii leat geahččalan guhká doalahit ealu čakča- ja skábmaorohagain, go leat vuordán ahte dilli buorrána veháš, čállet sii.
– Dilli lea vearáskan go dálki lea ollu rievddadan. Lea arván ja buolaštan ođđajagemánus, čilge Guttorm reivvestis fylkkamánnái.
Mánu vuodjingielddus
Fylkkamánni lea mearridan gaskaboddosaččat giddet máđijaid davábealde ja oarjjabealde Deanuleagi (Fylkkamánni siiddus).
Gielddus lea guovvamánu 8. beaivvis gitta njukčamánu 8. beaivái dán jagi.
Fylkkamánni dieđiha maid ahte buot vuodjinlobit mat olbmuin leat, eai leat dohkálaččat. Jus leat erenoamáš dárbbut vuodjit dan guovllus, de ferte ohcat beassat eret gildosis.
