Fylkkamánni gidde gaskaboddosaččat bievlamáđija 3 go orohat lea ávžžuhan fylkkamánni giddet vai bohccot bállejit ráfis.
Fylkkamánni gidde gaskaboddosaččat bievlamáđija 3 go orohat lea ávžžuhan fylkkamánni giddet vai bohccot bállejit ráfis.
Ávžžuhusas, man orohat 22 Fiettar lea sádden Fylkkamánnái, čuožžu «Rievssatbivdit johtet bievlamáđija gitta Galbaluktii (Iešjávri) go fievrredit gálvvuid, ja sii bohtet dainnalágiin min ealu lusa, maid mii eat sáhte viidáset dohkkehit. Rievssatbivdit muosehuhttet ealu go eai nagot stivret iežaset beatnagiid dan áiggis go bohccot dárbbašit ráfis».
Fylkkamánni ii leat ožžon mearkkašumiid suohkanis, ja lea mearridan giddet bievlamáđija Vuoddašjohka-Áhkárvárri-Iešjávri gaskaboddosaččat.
Fylkkamánnis lea vuoigatvuođavuođđu giddet mohtorjohtolaga gaskaboddosaččat «go lea dárbbašlaš boazodollui ja eará fuođđoealáhusaide, dahje eará beroštumit maid mohtorjohtolatláhka galgá áimmahuššat», mohtorjohtolatlága paragráfa 9 vuođul.
Fylkkamánni mearrida giddet máđija golggotmánu 20. beaivvis gitta skábmamánu 20. beaivái. Orohat 22 galgá maid addit dieđu Fylkkamánnái jus ovdal áiggi sáhttá rahpat fas luotta.
