Finnmárkku fylkkamánni lea vuodjinlobi guhkidan 123 skutermáđijas Finnmárkkus.
Fylkkamánni dieđiha ahte suohkaniidda addo ovddasvástádus árvvoštallat sihkarvuođa ja muohtavaljodaga dain rabas máđijain, ja giddet jus orru dárbu. (Geahča listtu áššis vuolemusas).
123 rabas máđija
Dan 184 ohccojuvvon máđijas leat 123 máđija mielde lohpi vuodjit dál. Eará máđijain giddejit vuodjinlobi miessemánu 4. beaivvi. Leat árvvoštallan sihke sihkarvuođa, muohttaga ja ahte sihke boazu ja eará fuođđoeallit váldojit vuhtii.
Suohkaniin ovddasvástádus gozihit
Suohkanat galget ieža giddet máđijaid jus siivu rievdá nu ollu dahje ii leat šat muohta man alde sáhttá vuodjit. Dat guoská earenoamážit máđijaide mat álget vuolládagas.
Suohkanat galget maid giddet máđijaid jus uđasvárra lassána dahje jus jieŋat leat asehaččat jávrriin ja jogain. Suohkanat galget gozihit varsom.no bokte dieđuid ja árvvoštallat uđasvára. Uđasvárra sáhttá rievdat beaivvis beaivái, dieđiha fylkkamánni.
Dihkáid čorgen
Jus boazodoalus sihtet dan, de galgá suohkan giddet máđijaid nu jođánit go vejolaš.
Suohkanat galget viežžat dihkáid ovdal go giddejit máđijaid, vai eai báze ruskan lundui. Spiehkastat guoská daidda suohkaniidda mat leat ožžon dispensašuvnna viežžat dihkáid maŋŋel go máđijat leat giddejuvvon.
Dás oainnát makkár máđijat leat ain rahpasat. Dieđut leat fylkkamánni siiddus.
