Finnmárkku fylkkasátnejođiheaddji oassalastii Barents parlamentarihkkárlaš konferánssas Narjan-Maras.
Finnmárkku fylkkasátnejođiheaddji oassalastii Barents parlamentarihkkárlaš konferánssas Narjan-Maras.
Konferánsa lei gaskavahkku ja čohkkii parlamentarihkkariid Suomas, Norggas, Ruoššas ja Ruoŧas. Fáddán lei innovatiivvalaš ja ceavzilis ovdáneapmi Barentsregiovnnas.
Deattuha fylkkaovttasbarggu
Konferánssas deattuha Finnmárkku fylkkasátnejođiheaddji Runas Sjåstad ahte lea dehálaš ovddidit Barentsregiovnna fylkkaid ovttasbarggu. Erenoamážit dál go árktalaš guovllut ožžot olu fuomášumi.
– Barentsguovlu ii leat go muđui árktalaš guovllut. Mis lea ealli servodat, mis lea arktalaš máhttu, mis leat áigahaš vierut ceavzilis ovdáneapmái ja mii ássat guovlluin gos maid leat álgoálbmogat. Dađibahábut leat olusat olggobeale min guovllu geat eai dieđe dan, lohká Sjåstad.
Oktasaš vejolašvuođat ja hástalusat
– Mis leat Eurohpá eanemus ođasmuvvi ja eai-ođasmuvvi resurssat, danne lea dehálaš riikkaidgaskasaš fylkkagielddalaš ovttasbargu. Barentsovttasbarggu fylkkain leat oktasaš vejolašvuođat ja hástalusat, mat leat sierraláganat, lasiha Sjåstad.
Son lohká ahte norgga Barentsčállingoddi Girkonjárgga lea dehálaš oassi riikkaidgaskasaš prošeaktaovttasbargguin. Davvi-Norgga Eurohpákantuvra Brusselis lea maid dehálaš diehtojuohkimis Barentsovttasbarggus.
– Mii fertet oažžut eret ájihemiid rájiidrasttildeamis, lohká Sjåstad.
Jođiha Barentsovttasbarggu
Čavčča rájes álgá Finnmárkku fylkkagielda regiovnnalaš jođihemiin Barentsovttasbarggus. Dat bistá guokte jagi. Regiovnnalaš Barentsovttasbarggus leat 14 fylkka Davvi-Suomas, Davvi-Norggas, Davvi-Ruoŧas ja Oarje-Davvi-Ruoššas.
